Eth govèrn deth Conselh Generau d’Aran, deuant des darrèri aconteishements e informacions oficiaus ath torn des mesures a préner respècte deth Coronavirus (COVID-19) comunique que procedís ath barrament ath public pendent 15 dies des diuèrsi equipaments ath sòn cargue:
- Hilat de Musèus dera Val d’Aran.
- Escòla de Tecnics Esportius Val d’Aran (ETEVA)
- Oficines Torisme Val d’Aran
- Centre de Tecnificacion d’Espòrts d’Iuèrn Val d’Aran (CETEI)
- Centre de dia dera tresaua edat
En aqueri equipaments e servicis que sigue possible se mantierà era atencion telefonica e telematica. Atau madeish, anulle totes es activitats organizades peth Conselh Generau atau coma es accions intèrnes que requerissen desplaçaments e/o amassades.
Aguestes mesures responen ath besonh, atau coma an recomanat es autoritats sanitàries competents, de contier e redusir eth contagi d’aguest virus, entà esvitar eth collapse deth nòste sistèma sanitari. Pr’amor d’açò eth govèrn deth Conselh vò arregraïr, en prumèra instància, eth trabalh e esfòrç que pendent aguesti dies realizen toti es professionaus d’Aran Salut e, ath madeish temps, era collaboracion des Ajuntaments aranesi que tanben an prenut mesures importants e damb afectacion ara poblacion.
Eth Conselh Generau d’Aran vò trasladar un messatge de tranquillitat e confiança ath temps que demane a tota era poblacion dera Val d’Aran qu’adòpte totes es mesures de prevencion e contencion que mèrquen eth Departament de Salut dera Generalitat e eth Ministèri de Sanitat deth Govèrn. Ei fòrça important limitar ath maxim eth contacte dirècte damb d’autes persones entà sajar d’arturar es contagis.
Totes aguestes mesures pòden veder-se modificades en foncion des requeriments des autoritats sanitàries.
Eth govèrn deth Conselh Generau d’Aran anarà informant sus era evolucion d’aguestes mesures e de quinsevolh nauetat que se pogue produsir.