• Er acte, que s’a realizat ena sedença deth Conselh Generau d’Aran, a estat presidit peth sindic d’Aran, Carlos Barrera, e a compdat damb era preséncia deth conseller de Cultura dera Generalitat de Catalunya, Ferran Mascarell, e deth conseller de Justícia dera Generalitat de Catalunya, Germà Gordó. Ar acte tanben an assistit era directora generau de Politica Lingüistica deth govèrn catalan, Ester Franquesa, eth cap de Politica Lingüistica d’Aran, Jusèp Loís Sans, atau coma conselhèrs deth Conselh Generau d’Aran, bailes d’Aran, eth cap de Cultura e Patrimòni d’Aran e membres der IEA.

Eth passat mes de gèr eth Govèrn dera Generalitat de Catalunya, tau coma preve era Lei der Occitan, aranés en Aran, der an 2010, aprovèc eth decrèt qu’autrege ar Institut d’Estudis Aranesi (IEA) eth caractèr d’Academia e d’autoritat lingüistica der occitan, aranés en Aran.

Er objècte der Institut d’Estudis Aranesi ei era nauta investigacion e estudi der aranés e er establiment des critèris de nòrma, d’acòrd damb es principis dera gramatica occitana de Loís Alibèrt e es Nòrmes ortografiques der aranés, coma part integranta der espaci lingüistic e culturau occitan. Atau madeish, a de collaborar damb entitats academiques, de recèrca o culturaus arreconeishudes pes institucions publiques der espaci occitan, er establiment dera nòrma lingüistica entath conjunt dera lengua occitana.

Damb era aprobacion deth decrèt, er Institut d’Estudis Aranesi se convertís en prumèr organisme der occitan qu’a reng academic. Atau madeish, eth decrèt investís ar Institut coma autoritat entar assessorament en Catalunya ena matèria de lengua aranesa, entàs administracions publiques e es organismes que ne depenen, entàs centres d’Ensenhament public e privat e entàs mejans de comunicacion de titolaritat publica.

En paraules deth sindic d’Aran, Carlos Barrera “damb era aprovacion deth Decret 12/2014 de 21 de gèr peth quau s’autrege ar Institut d’Estudis Aranesi eth caractèr d’Academia e d’autoritat lingúistica der occitan, aranés ennés, lengua pròpia en Aran e oficiau en Catalunya, s’artenh eth mès naut reconeishement entara nòsta lengua e possibilite ara Academia, creada per volentat deth Govèrn dera Generalitat de Catalunya e eth Conselh Generau d’Aran, era pervivéncia dera nòsta lengua, er aranés”

Er Institut d’Estudis Aranesi serà constituït per 21 persones, des quaus 11 son es actuaus membres der Institut d’Estudis Aranesi, qu’auràn de ratificar era sua volentat de contunhar coma membres dera Academia e autoritat sus era varianta aranesa.