Deuant era crisi deth coronavirus COVID-19 pera quau s’a decretat er estat d’alarma en tot eth país, eth govèrn deth Conselh Generau d’Aran a aprovat un nau decret entà ampliar es mesures de seguretat dejà establides.

Demoren barrades es següentes bastisses e installacions titolaritat deth sector public deth Conselh Generau d’Aran:

• Hilat de musèus dera Val d’Aran
• Escòla de Tecnics Esportius Val d’Aran (ETEVA)
• Oficines de Torisme Val d’Aran
• Centre de Tecnificacion d’Espòrts d’Iuèrn Val d’Aran (CETEI)
• Centre de dia dera tresau edat
• Aucidèr de Les
• Archiu Generau d’Aran
• Residéncia Sant Antòni de Vielha
• Refugis de montanha titolaritat deth Conselh

E se hig:

• Depòsits de dèishes de Bèusa (Vielha), Gessa (Naut Aran) e Tartèrs de Margalida (Bossòst), atau coma totes es installacions accessòries d’aguest servici.

Ath delà, era limitacion dera libertat de circulacion s’a ampliat as espacis d’usatge public e non sonque as vies e, per tant, afècte tanben ar espaci naturau.

Pr’amor d’açò s’a ordenat ath còs d’Agents de Miei Ambient deth Conselh Generau d’Aran qu’amien a tèrme es foncions de contròl e, eventuaument, denóncia e sancion, d’aqueres conductes qu’incomplisquen es proïbicions fixades peth Govèrn der Estat, en coordinacion damb es fòrces de seguretat der Estat e jos era direccion deth Ministèri d’Interior.

Era forma de procedir des Agents de Miei Ambient en aguest cas serà dar un prumèr avís as persones qu’incomplisquen es normes e, en cas de repeticion, se procedirà ara corresponenta denóncia.

Eth govèrn deth Conselh Generau d’Aran demane ath conjunt dera ciutadania que complisque damb es mesures de contencion establides entà esvitar era propagacion d’aguest virus.