• Er objectiu d’aguesta campanha, prebotjada per ICD e es Mossos d’Esquadra, ei qu’es hemnes en situacion de violéncia masclista en Aran compden pendent eth confinament damb eth supòrt des establiments dera Val d’Aran que s’i higen e que telefonaràn per eres ath 900 900 120 o ath 112 

Pr’amor deth risc que supause entàs victimes de violéncia de genre eth confinament establit pendent era crisi deth COVID-19, eth govèrn deth Conselh Generau d’Aran se hig ara campanha der Institut Català de les Dones (ICD) “Establiments segurs contra era violéncia de genre”.

Aqueri establiments comerciaus d’Aran que s’i higen plaçaràn en un lòc visible deth sòn locau un pannèu que senhalarà que formen part d’aguesta campanha. Aquiu, aqueres hemnes qu’ac agen de besonh poiràn sollicitar que telefonen per eres ara Linha d’Atencion contra era Violéncia Masclista (900 900 120) o a Emergéncies (112), se senten que casa sua non ei un lòc segur.

Aguesta campanha, ena que participen tanben es Mossos d’Esquadra, cerque aumentar eth supòrt sociau as persones mès vulnerables que trauèssen aguestes situacions e qu’actuaument pòden èster isolades damb es sòns agressors. Ei pr’amor d’açò qu’eth govèrn deth Conselh Generau d’Aran s’a considerat especiaument de besonh poder higer-se ad aguesta iniciativa entà atau, aufrir un canau mès d’ajuda ad aguestes persones.

Ei de besonh rebrembar que deuant aguesta situacion de confinament, s’a reforçat era linha 900 900 120 e s’a implantat un nau servici de WhatsApp entà facilitar er accés as hemnes que conviuen damb eth sòn agressor e non pòden realizar trucades (eth numerò ei eth 671778540), ath delà s’aten tanben via e-mail a trauès deth corrèu electronic 900900120@gencat.cat