• Era Fasa 3, qu’ei era darrèra fasa de desescalada deth COVID-19, poderie implicar era mobilitat entre províncies o autonomies que se trapen ena madeisha fasa

Eth departament de Salut dera Generalitat anoncièc ager que prepausarà ar Estat qu’era Val d’Aran, amassa damb era rèsta dera region sanitària deth Naut Pirenèu e Aran, auance eth pròplèu deluns, 8 de junh, ara Fasa 3 de desescalada deth COVID-19.

Eth sindic d’Aran, Francés Boya, s’a mostrat fòrça satisfèt damb aguest hèt pr’amor que: “era fasa 3 ei dejà era darrèra fasa de desescalda, eth pas prèvi ara naua normalitat”. Eth sindic afirme que: “arténher aguest auanç mos permeterà afrontar er ostiu damb bones perspectives, pr’amor qu’era recuperacion dera mobilitat permeterà a Aran reactivar era sua economia”.

Damb era fasa 3 se permeterà era mobilitat entre regions sanitàries que se trapen ena madeisha fasa, mès ager eth Ministre de Transpòrts, José Luis Ábalos, plantegèc tanben (segontes era evolucion dera pandèmia) era possibilitat de perméter es viatges entre províncies e comunitats autonòmes que se trapen ena madeisha fasa.

Ei previst qu’era siesau e darrèra prorròga der Estat d’Alarma finalize eth 21 de junh e, a compdar d’aqueth moment, se pogue repréner ua mobilitat normau, tostemp depenent dera evolucion epidemiologica.