• Enguan, pr’amor dera crisi provocada peth COVID-19, eth govèrn deth Conselh Generau d’Aran a organizat ua celebracion que se centrarà en un unic acte institucionau en Mijaran, damb aforament limitat entà garantizar es mesures de seguretat avientes, en qué s’amiarà a tèrme un reconeishement ath trabalh des professionaus sanitaris e essenciaus e en memòria des victimes qu’eth virus a deishat en Aran

Eth govèrn deth Conselh Generau d’Aran a premanit entath pròplèu 17 de junh un acte institucionau entà celebrar Hèsta d’Aran, ena que se commemòre era reinstauracion dera maxima institucion aranesa en 1.991.

Enguan, pr’amor dera crisi provocada peth COVID-19, aguesta Hèsta se centrarà en un acte institucionau, damb aforament limitat entà poder assegurar que se mantenguen es distàncies de seguretat e se complisquen damb es mesures de prevencion.

Pendent aguesta celebracion, qu’aurà lòc en Mijaran, se realizarà un reconeishement as professionaus qu’an estat ath capdeuant des servicis essenciaus pendent era crisi e ua menuta de silenci memòria des victimes deth COVID-19 en Aran. Er acte finalizarà damb un parlament deth sindic d’Aran, Francés Boya.

Eth sindic d’Aran afirme que “des deth govèrn deth Conselh Generau d’Aran enguan volíem celebrar aguesta hèsta entà hèr-la tanben propèra ara ciutadania, totun eth COVID-19 mos a portat a auer de replantejar es actes previsti” e hig que “reconéisher e arregraïr as professionaus sanitaris e professionaus essenciaus era sua entrega e rebrembar as que mos an deishat sense poder despedir-se des sues familhes, ei ua obligacion e un orgulh entath govèrn aranés”.

Entà assistir enguan ara Hèsta d’Aran ei de besonh qu’era ciutadania confirme era assisténcia via e-mail ath corrèu sindicatura@aran.org o ben telefonant ath 973 64 18 01, pr’amor qu’er aforament serà limitat, en tot complir damb era normativa establida. Ath delà, serà obligatòri er emplec dera mascareta e sauvar era distància de seguretat.