• Aguest projècte de valorizacion toristica deth refugi dera Honeria e er entorn dera Val de Toran a coma principau objectiu era potenciacion d’aguesta zòna de forma responsable e sostenible, e ei previst qu’es trabalhs d’adequacion e melhora siguen finalizadi en mai de 2021

Eth Conselh Generau d’Aran a adjudicat ara empresa Construccions Pirineu 2000 SL es òbres d’adequacion deth Refugi dera Honeria e lèu se començarà damb es trabalhs de melhora.

“Damb aguest projècte s’amiaràn a tèrme non sonque era reforma e adequacion deth refugi actuau senon tanben un seguit d’actuacions de condicionament enes camins istorics dera Val de Toran e era senhalizacion d’itineraris de senderisme, qu’ajudaràn a potenciar eth desvolopament toristic dera zòna d’ua forma responsable e sostenible”, afirme eth sindic d’Aran, Francés Boya.

Aguestes actuacions, qu’an un valor de lèu 450.000 euròs e son finançades peth Departament d’Empresa e Coneishement dera Generalitat de Catalunya e hons pròpris deth Conselh Generau d’Aran, auràn de perméter condicionar era Val de Toran e era sua accesibilitat, ath madeish temps que se presèrve er auviatge naturau e culturau que represente.

Es actuacions de recuperacion, condicionament e senhalizacion previstes enes camins de Grauèrs, Bedreda e eth camin dera presa de Barrier a Pradet, haràn qu’era aufèrta toristica d’aguest paratge sigue mès atractiva e variada entàs usatgèrs, mentre que, en çò que tanh ath refugi, non se cercarà era sua ampliacion, senon eth sòn renauiment e adequacion, de forma qu’eth nombre de places se mantierà mès se realizaràn ua serie de melhores, pr’amor qu’era installacion ei obsoleta dempús de vint ans aufrint servici. Era prevision ei qu’aguesti trabalhs siguen finalizadi en mai de 2021.