• Pendent era amassada mantenguda aguest maitin en Conselh Generau d’Aran, eth sindic d’Aran a artenhut eth compromís deth conselhèr de Territòri e Sostenibilitat dera Generalitat entà hèr front a dues problematiques clau en territòri: era viuenda e era mobilitat ena C-28

Aguest maitin eth sindic d’Aran, Francés Boya, a recebut ena sedença deth Conselh Generau d’Aran ath conselhèr de Territòri e Sostenibilitat dera Generalitat de Catalunya, Damià Calvet, e a mantengut damb eth ua amassada de trabalh ena que tanben an estat presents eth conselhèr de Territòri, Paisatge e Gestion Ambientau deth Conselh Generau, Francés Bruna, e era secretaria de Miei Ambient e Sostenibilitat, Marta Subirà, entre d’auti.

En aguesta amassada s’an tractat diuèrsi ahèrs primordiaus entath territòri, entre eri era melhora dera mobilitat ena C-28 pendent cèrti dies ar an ena sason d’esquí, a on era nauta afluéncia de visitants collapse era carretera pendent ores.

“Mos cau hèr ua apòsta per ua solucion relativament rapida que mos permete descollapsar aguesta via mès tostemps auent en compde qu’es coes se produsissen uns 30 o 40 dies ar an e, per tant, tanpòc podem hèr ua infraestructura que maumete eth territòri”, afirmaue eth sindic d’Aran, Francés Boya, en tot híger que: “era prepausa qu’auem hèt ath conselhèr ei d’explorar era possibilitat de mantier era carretèra actuau mès damb un tresau carril reversible que sigue ambientaument sostenible en quau, pendent es mesi enes qu’era C-28 non a ua afluéncia tan nauta, poguesse esdevier ua via verda que connècte damb eth projècte Transgarona, çò que mos permeterie arténher ua via ciclable que circule per tota era Val d’Aran a excepcion des mesi d’iuèrn”.

Aguest tresau carril, ère dejà contemplat en Estudi de Mobilitat dera C-28  dera Generalitat e, en aguest sens, eth conselhèr Calvet a expressat eth sòn compromís entà “presentar aguest Estudi ath territòri en brèu, daurir-lo a debat damb es sòns Ajuntaments, es agents socioeconomics e era ciutadania aranesa, entà que, en un termini que non aurie de superar es tres mesi, pogam aportar projèctes concrèts que donguen solucion ara problematica que se viu en aguesta via”.

D’un aute costat, s’a tractat tanben era problematica dera viuenda, sus era quau s’a artenhut eth compromís deth Departament de Territòri e Sostenibilitat de melhorar eth convèni en aguesta matèria entre andues institucions. “Auem plantejat ath conselhèr poder crear ua borsa de viuenda sociau que mos permete dar solucion as problèmes mès urgents qu’auem en aguesti moments que son, per un costat, era situacion des familhes mès vulnerables que se trapen sense accès ara viuenda e, d’un aute, era problematica des trabalhadors que non trapen possibilitat de lotjar-se pendent era tempsada d’iuèrn”, afirmaue Boya, en tot híger que: “des deth govèrn deth Conselh Generau volem realizar ua auditoria de tota era viuenda disponible, veir de quina manèra podem méter en mercat es viuendes que son en mans d’administracions o ajuntaments, impulsar era viuenda sociau e méter en foncionament ua estrategia ath torn dera reabilitacion de viuendes”.

Ath delà, eth conselhèr Calvet a anonciat tanben qu’enes pròplèu setmanes se harà efectiva era publicacion deth traspàs ath govèrn deth Conselh Generau des competéncies en gestion des grani carnivors e era sua dotacion economica, aprovada hè lèu dus ans.