Eth Plen dera Deputacion de Lleida a aprovat eth projècte constructiu “Condicionament, eishamplament e mielhora dera carretèra LV-5055, dera N-230 a Vilamòs, PK 0+00 enquiath 1+200, tram: Eth Pònt d’Arròs” per un impòrt 767.638,53€.

Aguesta ei ua actuacion fòrça reclamada pes Ajuntaments de Vilamòs e Arres, e peth Conselh Generau d’Aran, e serà ua realitat gràcies ath compromís qu’eth president dera Deputacion de Lleida, Joan Reñé, e eth deputat provinciau aranés, Pau Perdices, artenheren ena darrèra visita ara Val d’Aran.

En paraules deth deputat provinciau, Pau Perdices, “aguesta prumèra intervencion darà ua solucion ath prumèr tram dera carretèra de Vilamòs, eth tram mès complicat e permeterà qu’es vesins, autant d’Arres coma de Vilamòs, mielhoren de forma substanciau era sua seguretat en es sòns trajectes diaris tath trabalh”.

Es alcaldes d’Arres e Vilamòs an manifestat era sua satisfaccion en veir qu’aguest projècte serà ua realitat pendent aguest 2014.

D’aute biais, autant eth sindic d’Aran, Carlos Barrera, coma eth conselhèr d’Irissa, Francesc Medan, an arregraït eth compromís dera Deputacion de Lleida damb eth territòri, en tot soslinhar qu’”en ua situacion de crisis coma era actuau, veir que projèctes d’aguesta magnitud tiren entà deuant, demòstren qu’era politica ei er esturment entà poder mielhorar era vida des nòsti vesins”.