Pendent era primauera s’amiat a tèrme ua actuacion ena glèisa de Sant Ròc de Begós entà resòlver es grèus umiditats qu’afectauen era bastissa. Era intervencion qu’a auut un còst d’apruprètz 12.000€ a consistit en un drenatge perimetrau ena part mès afectada, eth costat nòrd dera bastissa a on se trape eth cementèri, en tot impermeabilizar era part inferiora deth mur e dotar-lo d’un sistèma d’evacacuacion d’aigües.

Era intervencion a permetut tanben méter de manifèst es origens romanics dera bastissa, tamb era eliminacion dera gèdra que caperaue eth pan de mur conservat en costat nòrd decorat tamb un fris de dents de ressèga e arcs cècs d’estil lombard e era descobèrta de part deth parament dera absida romanica integrat en ua ampliacion posteriora.
Eth Conselh Generau d’Aran a era intencion d’amiar a tèrme d’autes actuacions en edifici entà hèr-lo visitable pr’amor de considerar-lo un interessant exponent que permet seguir a trauès des sòns murs e mobiliari era seqüéncia cronologica e artistica des der estil romanic e gotic enquiar estil barròc des sègles XVII e XVIII sense desbrembar-se deth rempleg d’epòca romana integrat en mur que permet retrocedir enquiàs sègles IV o V dC.