En tot profitar era dubertura d’un viau e es òbres de pavimentacion dera plaça d’Aubèrt, eth Conselh Generau d’Aran a balhat supòrt tecnic e economic ara EMD d’Aubèrt entà hèr ua actuacion de drenatge e sanejament ena glèisa deth Rosèr d’Aubèrt tamb era fin d’eliminar es grèus umetats que patie enes murs deth costat nòrd e èst.

Era actuacion a consistit en rebaishament exterior deth terren per aguesti costats enquia arténher eth nivèu deth laguens dera glèisa, era impermeabilizacion des murs e eth bastiment d’un canau perimetrau entà recuelhe es aigües pluviaus.

Era òbra supòse ua inversion de 18.000 èuros, des quaus eth Conselh ne finance eth 70% en base ath nau protocòl d’intervencions en Patrimòni.

Eth Conselh Generau a previst completar era actuacion tamb un sanejament der interior deth campanau que se lheue ath dessús dera vòuta deth presbiteri.