• S’a sollicitat, per un costat, un estudi entà evitar qu’er aigua neta dera ploja arribe enes depuradores, procés que facilitarie que poblacions coma Vilamòs o Es Bòrdes poguessen auer en un futur es sues pròpries depuradores, e per un aute, era implantacion d’un collector ena poblacion de Bagergue

Es servicis tecnics deth Conselh Generau d’Aran an sollicitat ara Agéncia Catalana der Aigua (ACA) diuèrsi estudis qu’an, coma principau objectiu, melhorar eth sistèma de depuracion d’aigües enes disparièrs municipis dera Val d’Aran.

Per un costat, s’an demanat diuèrsi estudis entà analizar coma evitar qu’es aigües blanques, ei a díder, er aigua procedent dera ploja o eth desgèu, vagen a parar as depuradores enes nuclèus de Bossòst, Es Bòrdes, Vilamòs, Aubèrt, Escunhau e Vielha.

“Aguestes aigües blanques aurien d’anar a parar de forma dirècta ath riu, pr’amor qu’ei aigua neta que non a de passar peth procés de depuracion peth quau a de passar er aigua lorda que proven des activitats umanes”, explicaue eth conselhèr de Territòri, Paisatge e Gestion Ambientau, Francés Bruna, en tot híger que: “ath delà, en cas des municipis de Vilamòs e Es Bòrdes ei un projècte de besonh abans de poder sollicitar era sua pròpria depuradora”.

Per un aute costat, eth Conselh Generau d’Aran a sollicitat tanben que s’estúdie installar un collector ena poblacion de Bagergue que connècte er aigua procedent deth pòble e la hèsque arribar ena depuradora deth Naut Aran, “d’aguesta forma non serie de besonh que Bagergue auesse depuradora, damb er estauviament qu’açò supause, e es sues aigües se gestionarien ena depuradora municipau”, explicaue Bruna.