• Deuant dera negativa deth Departament d’Interior de dotar de veïculs ath còs de Pompièrs d’Aran, atau coma contemple er acòrd institucionau entre era Generalitat e eth Conselh Generau, e coma ja s’amie a tèrme damb d’auti parcs de pompièrs, eth govèrn deth Conselh Generau a determinat presentar un recors contenciós contra eth govèrn catalan

Aguest maitin, pendent era session extraordinària dera Junta Generau de Pompièrs-Emergéncies, eth govèrn aranés a informat dera presentacion d’un recors contenciós administratiu contra era Generalitat de Catalunya pr’amor der incompliment der Acòrd Institucionau de gestion integrau d’emergéncies en Aran, aprovat en an 2019 pera Comission Bilaterau Generalitat – Conselh Generau.

Er apartat 5 dera clausula 11 d’aguest acòrd de collaboracion determine que “pendent eth periòde de transicion entara implementacion deth modèl de gestion integrau d’Emergéncies per part deth Conselh Generau d’Aran, eth departament d’Interior aportarà es veïculs de besonh entath servici des Pompièrs d’Aran d’acòrd damb es critèris generaus qu’era Direccion Generau de Prevencion, Extincion d’Incendis e Sauvaments aplique entà distribuir e destinar es veïculs des Bombers dera Generalitat de Catalunya entre es diferents parcs de Catalunya. Enquiara finalizacion d’aguest periòde de transicion, eth 31 de deseme de 2022, es veïculs que s’incorpòren ath servici des Pompièrs d’Aran seràn aqueridi peth departament d’Interior”.

En aguest sens, era sindica d’Aran, Maria Vergés, informaue que: “pendent es mesi de gèr e junh de 2020, era Generalitat de Catalunya a aquerit 92 veïculs autobombes e 263 veïculs leugèrs destinadi ath còs de Bombers dera Generalitat, des quaus non n’a arribat cap tàs parcs de Pompièrs dera Val d’Aran”.

“Auem sollicitat, en diuèrses ocasions, explicacions sus es critèris de repartiment d’aguesti veïculs e auem demanat eth compliment der acòrd institucionau, autant ara Secretaria Generau d’Interior coma ath Departament d’Interior, mès non auem recebut responsa per part sua”, afirmaue era sindica d’Aran, en tot híger que: “deuant era manca de responsa reïterada que mos auem trapat per part dera Generalitat de Catalunya, auem determinat de denonciar aguesta situacion coma darrèr recors entà arténher eth compliment d’aguest acòrd, que per un aute costat, compromet era seguretat des professionaus deth còs de Pompièrs e era efectivitat des sòns servicis”.