Eth Conselh Generau d’Aran aprovèc eth manifèst de supòrt as associacions ramadères dera Val d’Aran e Catalonha respècte ath eth nau Programa de Desvolopament Rurau

Eth Plen demanarà ath Ministerio de Fomento eth besonh d’òbres de melhora dera seguretat ena N-230 dempús d’auer-se patit fòrça accidents pera manca d’infraestructures en bon estat

Pendent era darrèra session ordinària deth Plen deth Conselh Generau d’Aran, s’an aprovat per unanimitat es mocions entà dar supòrt as associacions ramadères dera Val d’Aran que manifèsten, per un costat, qu’eth nau Programa de Desvolopament Rurau perjudicie es sòns interessi. Eth dusau punt siguec era demana ath Govèrn Espanhòu dera inversion deth 5% dera Política Agrària Comuna qu’an de recéber es zònes de montanha, e qu’enquiara non an estat efectuades.

Eth Plen tanben a aprovat hèr ua demana ath Ministerio de Fomento entà qu’apariguen era N-230. Es condicions de seguretat dera carretèra son deficitàries e s’a de melhorar era sua seguretat. Segontes paraules deth sindic d’Aran, Carlos Barrera, “ei de besonh ua melhora d’aguesta via pr’amor que cada dia i transiten fòrça camions, e era seguretat non ei garantida entà toti es veïculs que i circulen. Es diuèrsi episòdis d’accidents mos dan era arrason”. Aguesta ei ua declaracion que hèn conjuntaments era Val d’Aran e era Alta Ribagorça.

Ath delà, eth Plen deth Conselh Generau tanben aprovèc per unanimitat era demana ara Confederación Hidrográfica del Ebro (CHE) de reinversion dera possibla demana economica sus er expedient sancionador a ENDESA anonciat peth president dera CHE, Xavier de Pedro. Segontes Barrera, “en cas de complir-se aguest expedient, demanaram qu’era quantitat economica sigue invertida en apariar diuèrsi airaus dera Val d’Aran afectats pes aiguats der an passat, sustot en Arties, Casarilh e Escunhau”. En aguest sens, Barrera, tanben a higit que “se li demanarà ara CHE ua partida naua de 4 milions d’èuros entà acabar d’apariar tot çò qu’encara lis manque per hèr, pr’amor qu’eth 50% deth trebalh non l’an acabat”. Eth Plen tanben acordèc elaborar un informe juridic entà auer coneishements juridics sus es actuacions que s’an d’amiar a tèrme enes arrius.

Eth Plen tanben aprovèc era cession gratuïta der usatge d’ua parcèla per part dera Agéncia de Residus de Catalunya, que se trape en municipi de Vielha e Mijaran, ath cant dera depuradora. Ua cession que serà a 30 ans e que supausarà er enderròc dera vielha depuradora, a cargue deth Conselh Generau d’Aran.