Pendent eth romiatge de Montgarri, que coma cada an a lòc pendent eth 2 de junhsèga, s’a amiat a tèrme era entronizacion dera naua imatge dera Mair de Diu de Montgarri, a cargue der arquevèsque d’Urgelh, Joan Enric Vives. Aguesta imatge a estat realizada per artista Antonio Fernández de Ortega e Garcia de Acilu, que tanben ei er autor dera talha presentada en 2012 dera madeisha imatge entàs processons.

Eth sindic d’Aran, Carlos Barrera, en reconeishement a ua longa vida der artista en tot realizar òbres enta Val d’Aran, li a liurat ua placa commemorativa en Montgarri, en tot arregrair-li era sua aportacion inmensurabla ath patrimòni artistic aranés.

“Aguest reconeishement qu’auem hèt pendent eth romiatge de Montgarri, ei un arregraïment a ua persona qu’a trebalhat pendent fòrça ans dera sua vida, en tot enriquir eth patrimòni culturau dera Val d’Aran”, comente eth sindic d’Aran, Carlos Barrera.

Pera sua part, eth cap de Cultura e Patrimòni, Jèp de Montoya, a higit qu’”er artiste a realizat ua òbra inmensurabla autant en País Basc coma en Aran, e qu’es especialistes en art le comencen a denominar “eth Mèstre de Vitòria e de Mijaran” en tot pensar ena sua inmensurabla òbra e en Devarament deth Crist de Mijaran”.

Fernández de Ortega e Garcia de Acilu comencèc a trebalhar ena Val d’Aran hè més de quinze ans e ei er autor d’òbres coma: era restauracion dera Creu Processionau de Les, era còpia dera Mair de Diu de Mijaran, eth Devarament deth Crist de Mijaran damb es personatges de Nòste Sénher, Era Mare de Diu, Jusèp d’Arimatea, Nicodem e Sant Joan a tamanh naturau en tot préner coma referéncia eth Crist de Mijaran e es diferenti devaraments romanics der Atelier d’Erill e dera Val de Boí, eth Retaule de Mijaran damb es imatges de Jaime Ièr e eth Venerable Frai Joan de Vilamòs, era restauracion de Santa Lúcia, Sant Julià e era Mare de Diu de Garòs, o de Santa Anna damb era Mair de Diu mainada, Sant Ròc e era Mair de Diu deth Rosèr d’Aubert, Nòsta Senhora de Montgarri, autant era talha presentada en 2012 entàs processons, coma era que s’a entronizat entà que presidisque aguest santuari.