Imatge d’archiu

• Es Agents de Miei Ambient deth Conselh Generau d’Aran an confirmat er atac, que se produsic era passada dimenjada, ena net de diuendres a dissabte, ena carretèra de Beret

• Se confirme tanben un nau atac apicola ena zòna de Pònt d’Arròs

Es Agents de Miei Ambient deth Conselh Generau d’Aran an confirmat un nau atac d’os, en aguest cas a un ovin, enes visères dera carretèra de Beret. Er atac s’aurie produsit era net de diuendres, 28 de mai, a dissabte, 29 de mai.

Es Agents cerquen tanben un mardan e ua anhèra deth madeish propietari, qu’a denonciat era sua desaparicion.

Atau madeish, s’a confirmat un nau atac apicola ena zòna de Pònt d’Arròs, produsit tanben eth passat diuendres.

D’un aute costat, s’a desestimat qu’eth vedèth trapat ena Ribèra de Bagergue age mòrt per atac d’un platigrad.

Damb aguesti son ja 9 es atacs d’os confirmadi ena Val d’Aran aguesta sason.

Cau rebrembar qu’eth Conselh Generau d’Aran dejà a iniciat es agrupaments de ramats vigiladi damb pastor, a on toti es ramadèrs deth territòri pòden híger es sòns caps de bestiar. Ath delà, hè dus ans s’abilitèc tanben ua linha d’ajudes entà qu’es ramadèrs poguen crubar parciaument eth bestiar non retornat des pastures d’ostiu ena Val d’Aran.