• Se regule er accès as zònes de Varradòs, era Artiga de Lin, Aiguamòg, Valarties, Bassa d’Arres, Bassa d’Oles e Bausen segontes era ocupacion e places liures que i age enes parcatges d’aguesti endrets entà evitar massificacions

• Eth Conselh Generau d’Aran met en marcha eth plan pilot entà mostrar en temps reau er estat d’ocupacion des principaus espaci naturaus dera Val d’Aran, a trauès dera app toristica GuidAran e dera plataforma digitau AparcAran que, ath delà, permeten era resèrva prèvia d’aparcament ena Artiga de Lin e era zona de Colomèrs

Eth Conselh Generau d’Aran met en foncionament, a compdar d’aué enquiath dia 14 de seteme, es mesures de regulacion d’accès ath miei naturau enes zònes damb mès afluéncia pendent er ostiu: Varradòs, era Artiga de Lin, Aiguamòg, Valarties, Bassa d’Arres, Bassa d’Oles e Bausen.

“Auem implementat diuèrses mesures entà regular er accès as principaus airaus d’interès naturau ena Val d’Aran entà, per un costat, garantir era seguretat des usatgèrs e usatgères d’aguestes pistes e melhorar era sua experiéncia e, per ua auta, preservar aguesti endrets naturaus e evitar era sua massificacion”, afirmaue eth vicesindic e conselhèr d’Economia, Torisme e Promocion Economica, Juan Antonio Serrano, en tot híger que: “damb aguestes mesures volem tanben promocionar entre es nòsti visitants d’auti paratges naturaus mens coneishuts coma alternativa as punts mès emblematics e concorruts pendent aguesti mesi”.

Pera sua part, eth tanben conselhèr d’Economia, Torisme e Promocion Economica, Josep Canut, explicaue que: “aguestes  mesures s’amiaràn a tèrme a trauès de diuèrsi vigilants que se plaçaràn en accès ad aguesti paratges e que regularàn eth pas segontes era ocupacion e places liures que i age enes parcatges” e higie que: “auem metut en marcha tanben un plan pilòt peth quau, a trauès dera plataforma web AparcAran e dera madeisha app toristica GuidAran, facilitam informacion a temps reau der estat de massificacion d’aguesti set punts e permetem reservar parcatge ena Ribèra d’Aiguamòg e ena Artiga de Lin”.

Es donades obtengudes enguan, serviràn entà elaborar un plan de mobilitat dera Val d’Aran, que permeterà establir es mesures adientes en aguesta matèria pendent es pròplèu ans.

Aguesta ei ua des actuacions mès importantes desvolopades enguan en marc deth Plan de Sostenibilitat Toristica dera Val d’Aran, un plan a desvolopar en 3 ans e qu’ei dotat d’uns 2,5 milions d’euros per part der Estat.