• Pendent eth maitin d’aué era sindica d’Aran e eth conselhèr de Territòri, Paisatge e Gestion Ambientau, acompanhadi pes alcaldes de Canejan, Les, Bossòst e Vielha e Mijaran, an visitat es zònes mès afectades pes botassades dera setmana passada entà veir quines actuacions s’an d’amiar a tèrme deth Conselh Generau d’Aran ençà e meter-se a disposicion des Ajuntaments en tot çò que les sigue de besonh

Era sindica d’Aran, Maria Vergés, acompanhada peth conselhèr de Territòri, Paisatge e Gestion Ambientau, Francés Bruna, e es alcaldes de Canejan, Les, Bossòst e Vielha e Mijaran, a visitat pendent eth dia d’aué es parçans mès afectadi pes botassades provocades pes intenses plojes dera passada setmana.

“Deuant der intens episòdi de ploja que viuec era Val d’Aran eth passat deluns, deth Conselh Generau d’Aran ençà dejà mos metèrem en contacte aqueth madeish dia damb es alcaldes e alcaldesses des diferents municipis aranesi entà conéisher es desperfèctes provocadi per aigua” explicaue era sindica d’Aran, en tot híger que: “aué auem volut desplaçar-mos as zònes mès afectades entà conéisher quines actuacions auram d’amiar a tèrme damb era brigada de servicis deth Conselh e entà meter-mos a disposicion des Ajuntaments en toti aqueri ahèrs que siguen de besonh”.

Era brigada de servicis (SAVA), dera setmana passada ençà dejà amie a tèrme trabalhs en diuèrsi endrets afectadi per aguestes plojes e ac contunharà hènt ena mesura qu’era meteorologia ac permete.