• Eth 26 de març en Pla de Beret aurà lòc er acte “El Valle Grita” coma mòstra de reconeishement e estima ar artista, a on s’amiarà a tèrme era gravacion d’un videoclip dubèrt a tot eth mon entà interpretar ua des sues cançons mès significatives: Grita.

I a vides que trascendissen ath sòn pròpri temps e dèishen ua peada que non se pòt desbrembar. Pau Donés mos ensenhèc a cridar que víuer ei urgent!

Per aguest motiu, era Val d’Aran, coma mòstra de reconeishement e estima, acuelherà, eth pròplèu 26 de març, er acte “El Valle Grita”, coma aumenatge ara trajectòria artistica e umana deth cantant e compositor que moric en an 2020.

A trauès d’aguest acte, en quau s’amiarà a tèrme era gravacion d’un videoclip collectiu en Pla de Beret, se preten amassar a totes aqueres persones que volguen (musics e/o admiradors der artista) entà interpretar de manèra collectiva ua des sues cançons mès significatives: Grita.

Eth promotor dera idèa, eth musicaire Mario Carnero, apassionat dera Val d’Aran e es sues montanhes, insistís en que se tracte d’un aumenatge dubèrt a toti es que volguen participar: “volem qu’es veus e instruments musicaus se senten en aguesta tèrra que Pau tant estimaue e que siguen testimònis d’un acte unic en sòn rebrembe”.

Donés siguec, e encara ei a dia d’aué, ua persona molt estimada e admirada en Aran, un lòc damb eth que tostemp auec ua conenexion unica e especiau.

Musica, art, amistat e natura s’amassaràn entà tostemp en aguest paratge unic, pr’amor qu’er eveniment serà enregistrat en un espectacular videoclip entà qu’eth mon veigue coma “El Valle Grita”.

Entà poder participar en aguest acte e gaudir der espectacular paisatge de Beret en tot participar d’aguesta experiéncia musicau que vò rendir aumentage a Pau Donés e era su forma d’enténer era vida, cau inscriuer-se de franc ena web der eveniment: www.elvallegrita.org a on se pòt trapar era base musicau que s’emplegarà coma referéncia entà qu’es musics e cantaires assistents poguen hèr era sua interpretacion.

Er eveniment compde damb era collaboracion deth Conselh Generau d’Aran, er Ajuntament de Naut Aran, era estacion Baqueira Beret e era Orquesta Simfònica de l’Escola de Música de l’Ofeó Lleidatà.

A trauès des hilats sociaus der eveniment e des entitats collaboradores, s’anaràn desvelant es detalhs e oraris der acte.