• Aguest passat diuendres era sindica d’Aran, dera man deth Secretari Generau tath Rèpte Demografic, s’amassèc en Saragossa damb era presidenta dera CHE damb qui tractèc sus diuèrsi ahèrs d’interès tara Val d’Aran

Era sindica d’Aran, Maria Vergés, s’amassèc eth passat diuendres en Saragossa, acompanhada peth Secretari Generau tath Rèpte Demografic, Francés Boya, damb era presidenta dera Confederación Hidrográfica del Ebro (CHE), Mª Dolores Pascual, en ua prumèra trobada que servic entà abordar diuèrsi ahèrs d’interès entara Val d’Aran relacionadi damb projèctes e òbres impulsadi autant peth Conselh Generau d’Aran coma pes ajuntaments aranesi.

Era CHE ei er organisme responsable dera planificacion idrologica e dera gestion des aigües en encastre dera demarcacion der Èbre. Aguest ens, adscrit ath Ministèri tara Transición Ecologica e Rèpte Demografic.

Aguesta amassada permetec dar a conéisher ara presidenta dera CHE eth detalh des diuèrsi projèctes qu’eth Conselh Generau d’Aran amie a tèrme, coma pòt èster eth camin ciclable dera Garona que veirà era lum aguest ostiu, e qu’an de besonh es pertinentes autorizacions d’aguest organisme entà seguir auançant.

“Aguesta a estat ua trobada fòrça profitosa que m’a permetut explicar as responsables dera CHE quini son es besonhs dera Val d’Aran” a declarat era sindica d’Aran ath temps que a volut “arregraïr era predisposicion e interès dera presidenta dera CHE entà conéisher de prumèra man era situacion de toti aguesti projèctes”.