• Ager ena tarde auec lòc era amassada entre era sindica d’Aran e es alcaldes des municipis aranesi entà tractar sus era disponibilitat dera Val d’Aran entà acuélher persones refugiades dera guèrra d’Ucraïna e avalorar era capacitat d’acuelhuda entà trasladar aguesta informacion ath Ministèri d’Inclusion, Seguretat Sociau e Migracions, e ara Generalitat de Catalunya coma administracions competentes ena matèria

Era sindica d’Aran, Maria Vergés, mantenguec ager ena tarde ua amassada entre damb es alcaldes des municipis aranesi entà tractar sus era disponibilitat dera Val d’Aran entà acuélher persones refugiades dera guèrra d’Ucraïna e avalorar era capacitat d’acuelhuda entà trasladar aguesta informacion ath Ministèri d’Inclusion, Seguretat Sociau e Migracions, e ara Generalitat de Catalunya coma administracions damb competéncies en aguestes qüestions.

Pendent aguesta amassada, se parlèc tanben sus es persones que, a títol individuau, vòlen aufrir bèth abitatge uet e s’acordèc que, en aguesti casi, eth procediment a seguir serie qu’aguestes persones s’adrecen as ajuntaments entà balhar aquiu es sues donades tà pòder hèr-les arribar as administracions competentes.

D’un aute costat, es persones que, tanben a titol individuau, volguen acuélher enes sòns larèrs a persones refugiades, se pòden méter en contacte directament damb eth Ministèri d’Inclusion, Seguretat Sociau e Migracions o damb era Generalitat de Catalunya.

Era sindica d’Aran a volut “arregraïr era totau collaboracion e disposicion des municipis aranesi entà cooperar en aguesta crisi” e higie que “coma societat responsabla, solidària e desvolopada qu’a demostrat èster era aranesa, pensi qu’ei tanben eth nòste déuer e obligacion aufrir era nòsta ajuda, en marge des nòstes possibilitats e competéncies, entà sajar d’amendrir eth dolor e patiment de tanti milèrs de persones victimes der orror e era injustícia”.

En çò que hè ar enviament de tot eth materiau umanitari remassat pendent era campanha solidària gestionada peth còs de Pompièrs d’Aran, eth Conselh Generau d’Aran dejà trabalhe entà poder garantir er enviament de tot eth materiau pendent es pròplèu dies.