• Es passadi dies 31 de març e 1 d’abriu eth Conselh Generau d’Aran aufric as estudiants de prumèr e dusau de bachelierat der Institut d’Aran aguestes charrades damb er objectiu qu’era joenessa prengue consciéncia des procèssi de substitucion lingüistica e, sustot, dera importáncia qu’a qu’agen un papèr actiu ara ora de revertir era situacion en cas des lengües menaçades com er aranés

Eth Conselh Generau d’Aran, amassa damb er Institut d’Aran, organizèc era passada setmana ues charrades sus era diversitat lingüistica en mon, en generau, e ena Val d’Aran, en particular, entàs alumnes de prumèr e dusau de bachelierat deth centre.

En aguestes charrades s’expliquèc era diversitat lingüistica en mon, en Catalonha e, en concrèt, ena Val d’Aran. Er objectiu ère qu’es joeni prenguen consciéncia des procèssi de substitucion lingüistica e, sustot, de qu’an un papèr actiu ara ora de revertir era situacion en cas des lengües menaçades com er aranés.

Es charrades son ua propòsta de Marc Piera, catalan e filològ, especialista en diversitat lingüistica, que des deth 2001 hè aguest tipe de conferéncies e talhèrs damb fòrça succès en instituts catalans.

Son plantejades damb casi practics, exemples reaus e conviden a reflexionar e debàter. S’adapten ath grop de classe en concret, tient en compde se son estudiants de sciéncies o de d’autes especialitats.