• Eth Conselh Generau d’Aran realizarà un seguit d’actes tà celebrar eth 80 aniversari dera mòrt d’aguest insigne aranés, coma era presentacion deth libre sus era vida e òbra de Sandaran, era lectura de quauques des sues poesies aguest dissabte tà Sant Jòrdi (en collaboracion damb era associacion Lengua Viua), era realizacion d’un video commemoratiu e d’autes activitats que s’anaràn anonciant ath long der an

Eth Conselh Generau d’Aran vò declarar en sòn proxim Plen er an 2022 “An Sandaran” en aunor ad aguest insigne aranés neishut en Canejan en 1875 e mòrt en 1942 en Barcelona, a on demorèc des de ben petit.

Enguan se celebren, per tant, eth 80 aniversari dera sua mòrt e ei per aquerò qu’era maxima institucion aranesa, en aumenatge ara sua figura, vò dedicar aguest an a organizar ua sèrie d’actes damb era fin de hèr a conéisher era sua vida e òbra.

Josèp Sandaran Bacaria siguec un intellectuau aimant dera sua tèrra de neishença e dera sua gent, estudiós dera sua lengua, er aranés, poèta e companh de d’auti intellectuaus dera sua epòca, autant gascons coma catalans, (Condò, Sarrieu, Carner…) e a qui deuem era prononciacion d’ua conferéncia sus era Val d’Aran en Ateneu Obrèr deth districte II de Barcelona en an 1913 que damb eth títol “La Vall d’Aran i els catalans” e damb ua notabla repercussion, transmetec era constatacion deth desbrembe que patie Aran e era sua lengua. Siguec fondador tanben en 1932 deth Centre Aranés en Barcelona.

Eth Conselh Generau d’Aran, a trauès der airau de Cultura e Lengua, er Archiu Generau d’Aran, eth Musèu dera Val d’Aran, e damb era collaboracion dera istoriadora Ma. Àngels Sanllehy, e dera arrèrhilha der aumenatjat, Eulàlia Sandaran, realizarà un seguit d’actes tà celebrar aguest aniversari, coma era presentacion deth libre sus era vida e òbra de Sandaran, era lectura de poesies de Sandaran tà Sant Jòrdi en collaboracion damb era associacion Lengua Viua aguest dissabte, era realizacion d’un video commemoratiu que se pòt veir aciu: https://www.youtube.com/watch?v=dwB8SUIF7Fs&ab_channel=conselharan

“En Aran auem dues figures subergessentes en camp dera lengua e era cultura, ua ei Mossen Condò e er auta, mens coneishuda, ei Josèp Sandaran a qui, damb aguest reconeishement, volem méter en valor e dar a conéisher mès eth sòn legat e era sua òbra”, afirmaue era sindica d’Aran, Maria Vergés.