• Eth Plen deth Conselh Generau d’Aran a aprovat aué, per unanimitat, era modificacion deth contracte actuau de gestion, manteniment, operativitat e explotacion der elipòrt de Betren entà assegurar eth servici

• Pendent eth Plen d’aguest maitin, s’a aprovat tanben era modificacion dera taxa de residus entà 2023 e dar atau compliment ara normativa vigenta deuant der aument der IPC e dera pujada deth prètz deth Tarcumèr de Fígols, que supausarà ua despena d’ath torn de 6 euros ar an per familha

Eth Plen deth Conselh Generau d’Aran a aprovat aué, per unanimitat, pendent era celebracion d’ua session extraordinària, era modificacion deth contracte actuau de gestion, manteniment, operativitat e explotacion der elipòrt de Betren entà assegurar eth servici.

“Dejà hè uns mèsi qu’eth Conselh Generau d’Aran dipause d’un elicòpter tà efectuar rescats de montanha a trauès d’un acòrd damb era empresa que gestione er elipòrt. Ère de besonh formalizar aguest acòrd damb ua modificacion de contracte, qu’ei çò qu’auem aprovat aué en Plen entà, ath long d’aguesti pròplèu mèsi, trabalhar ena licitacion integrau dera gestion der elipòrt e qu’atau era Val d’Aran pogue compdar, de manèra definitiva, damb un elicòpter e professionaus de manèra fixa en territòri” a explicat era sindica d’Aran, Maria Vergés.

Pendent eth Plen celebrat aguest maitin ena Casa deth Senhor d’Arròs, s’a procedit tanben ara aprobacion dera modificacion dera taxa de residus entà 2023 e dar atau compliment ara normativa vigenta deuant der aument der IPC e dera pujada deth prètz deth Tarcumèr de Fígols, que supausarà ua despena d’ath torn de 6 euros ar an per familha.

En aguest sens, era sindica d’Aran a afirmat que: “aguest aument respon, d’un costat, ara pujada der IPC e ara obligacion qu’era maxima institucion aranesa a, per contracte, damb era empresa concessionària e, per un aute costat ar aument deth prètz qu’eth Tarcumèr de Fígols mos crube pr’amor dera rèsta qu’enviam” e higie que “deth Conselh Generau ençà dejà auem ajustat aguest aument entà sajar qu’era inflacion age en aguest airau eth menor impacte possible ena economia des familhes araneses”. Tanben asseguraue que, en çò que hè ath prètz qu’eth Tarcumèr crube ara Val d’Aran: “a un pes molt important eth naut nivèu de rèsta que generam e eth baish nivèu d’organica. Un des rèptes qu’auem ei eth reciclatge dera organica, s’aguest reciclatge s’amie a tèrme de forma corrècta aqueri còsti aurien d’èster menors”.

Tanben s’an aprovat es requisits lingüistics entara provision de lòcs de trebalh de foncionaris d’administracion locau damb abilitacion de caractèr nacionau en territòri dera Val d’Aran.

Vielha, 14 d’octobre de 2022