• Aguest meddia, per prumèr còp ena istòria, a auut lòc ena Val d’Aran era amassada dera Mesa deth Parlament e ua trobada institucionau entre era sindica d’Aran, Maria Vergés, e es conselhèrs Angelina Cases e Francés Bruna damb era vicepresidenta prumèra deth Parlament, Alba Vergés, e es membres dera Mesa.

• Acuélher aguesta trobada ena sedença deth Conselh respon ara linha d’accions encetada peth govèrn aranés d’apropar era cramba catalana e es sòns diputats ara realitat e singularitat dera Val d’Aran, en tot trabalhar en camin dera leiautat e respècte insitucionaus.

Era sedença deth Conselh Generau d’Aran a acuelhut aué, per prumèr vatge, era prumèra amassada der an dera Mesa deth Parlament de Catalunya. Era sindica d’Aran, Maria Vergés, e era vicepresidenta prumèra deth Parlament, Alba Vergés, an presidit era amassada institucionau prèvia ara Mesa, qu’a compdat tanben damb era participacion des conselhèrs d’Aran Angelina Cases e Francés Bruna, atau coma es pròpris membres dera Mesa.

“Er hèt de recéber per prumèr còp ua amassada dera Mesa deth Parlament ena sedença deth Conselh Generau respon ad aquera linha encetada damb es darrères compareishençes dera sindicatura ena cramba catalana, en tot sajar d’apropar aguesta institucion e es sòns diputats ara realitat e singularitat dera Val d’Aran” expressaue era sindica d’Aran, en tot híger que: “ei volontat deth govèrn d’Aran mantier e desvolopar era leiautat e respècte entre es institucions, que consideram essenciau e que ei deth tot compatible damb era defensa der autogovèrn aranés e des interèssi deth nòste territòri”.

Era sindica a trasladat tanben ara vicepresidenta era demana de poder tractar en prumèr plen dera cramba era iniciativa legislativa registrada per part deth govèrn d’Aran eth passat mes de noveme en Parlament entara modificacion dera disposicion addicionau dera Lei des Lengues Oficiaus en Ensenhament, que suprimís eth caractèr de “lengua veïculara” der aranés. Un ahèr qu’era sindica dejà tractèc ena sua darrèra compareishença en Parlament, en tot demanar as grops parlamentaris que “se pogue amiar a tèrme per lectura unica, entà poder resòler damb era màger brevetat possible aguesta situacion de manca de seguretat juridica tara nòsta lengua”.

En aguest sens, era vicepresidenta prumèra a manifestat que: “coma Mesa deth Parlament prepausaram qu’aguesta iniciativa legislativa pogue èster debatuda en prumèr Plen deth Parlament” e a destacat que: “eth compromís dera institucion damb aguest ahèr ei totau e mòstra d’aguest compromís ei er hèt d’auer-mos desplaçat aué entà amiar a tèrme era prumèra amassada dera Mesa”.