• A trauès deth Plan de Sostenibilitat Toristica dera Val d’Aran, eth Conselh Generau d’Aran desvoloparà pendent es pròplèu mesi diuèrsi projèctes centradi en airaus tant importants coma era creacion de rotes que meten en valor eth patrimòni e cultura araneses, eth foment d’un torisme accessible, era diversificacion des punts d’interès, era promocion deth ciclisme en territòri o era regulacion intelligenta der accès ath miei naturau, entre d’autes

 

 

 

 

 

Eth Conselh Generau d’Aran, a trauès de Foment Torisme Val d’Aran, implementarà naues rotes, actuacions entara melhora dera accessibilitat, accions entà méter en valor era riquesa e atractiu des pòbles d’Aran e d’autes actuacions a desvolopar laguens deth Plan de Sostenibilitat Toristica dera Val d’Aran.

“Era Val d’Aran siguec ua des 25 destinacions escuelhudes per Estat, d’entre es 154 candidatures que se presentèren, entà desvolopar un Plan de Sostenibilitat Toristica dotat de 2,5 milions d’euròs, qu’a coma objectiu melhorar es nòsti entorns naturaus, era mobilitat e era gestion deth nòste territòri”, manifestaue era sindica d’Aran, Maria Vergés, en tot híger que: “ath delà des accions dejà realizades, amiaram a tèrme diuèrses actuacions pendent es pròplèu mesi, centrades ena mobilitat sostenibla, era regulacion d’accèssi, era diversificacion dera aufèrta toristica e era implementacion des naues tecnologies entà auançar enquia ua destinacion intelligenta e sostenibla”.

Rotes tematiques d’istòria, cultura e natura

A compdar d’aguesta primauera, era Val d’Aran aufrirà naues rotes tematiques de senderisme qu’auràn eth sòn punt d’inici en diferents pòbles dera Val d’Aran e que permeteràn méter en valor diuèrsi elements dera istòria, era cultura e era natura dera Val d’Aran.

“Er objectiu d’aguestes rotes ei méter en valor er atractiu e era riquesa des nòsti pòbles, ath madeish temps qu’amiam a tèrme ua accion de divulgacion e promocion dera identitat d’Aran” explicaue eth conselhèr d’Economia, Torisme e Promocion Economica, Juan Antonio Serrano, en tot híger que: “es rotes auràn ua dificultat minima entà que siguen fòrça accessibles”.

D’aguesta manèra, es visitants que realizen aguestes rotes poderàn conéisher mès sus era Istòria Medievau en Les, era Fauna dera Val d’Aran en Bossòst e Antics oficis des hemnes dera Val d’Aran en Vilamòs.

Un territòri qu’apòste pera bicicleta

Eth departament de Torisme deth Conselh Generau a amiat a tèrme ua reestructuracion dera sua aufèrta toristica, en tot plaçar era bicicleta coma un des pilars deth sòn Plan de Sostenibilitat Toristica.

“Era Val d’Aran ei un territòri dejà fòrça auançat en matèria de ciclisme, mès volíem potenciar encara mès aguesta activitat que guanhe, cada còp, mès adeptes e ena qu’eth nòste territòri se pòt plaçar coma destinacion de referéncia internacionau ath temps que volem hèr tanben un trabalh de sensibilizacion e respècte der entorn damb es usatgèrs”, asseguraue eth conselhèr d’Economia, Torisme e Promocion Economica, Josep Canut.

En tot seguir aguesta linha de trabalh, s’an reestructurat  totes es rotes existentes entà adaptar-les as naues modalitats de ciclisme actuaus: MTB-Gravel, Trail Enduro, Ebike e ciclisme de carretèra, atau madeish s’an mercat nauament totes aguestes rotes, adaptant es senhaus ara naua aufèrta,  s’an installat senhaus damb es rotes existentes enes diferenti sectors creadi.

S’an aquerit 6 punts entà lauader e reparacion, s’a mantengut eth servici de transpòrt public de bicicletes en ostiu, s’an senhalizat nauament es pòrts de montanha damb informacion detalhada en cada km e s’an creat triptics divulgatius damb es diuèrses modalitats de bicicleta.

Atau madeish, entà identificar era aufèrta de bicicleta dera Val d’Aran, s’a creat era mèrca Òcbike Val d’Aran, que vò includir autant es prepauses d’itineraris deth territòri coma es empreses qu’aufrissen servicis especializadi en aguest sector.

Entad aguest ostiu dejà se trabalhe ena creacion de naues rotes ena montanha de Tuca, Mines Victòria, Toran e Varradòs, ena potenciacion deth ciclisme familhar en tot centrar-se en èish Transgarona e eth traçat de naues rotes especifiques entà Ebikes. Tanben se prebotjarà era campanha de sensibilizacion “Camins compartits” e se crearà eth catalòg de presentacion dera aufèrta de bicicleta dera zòna.

Fomentam eth torisme accessible

Era Val d’Aran facilitarà, a compdar d’aguesta primauera, er accès a persones damb mobilitat redusida a un des endrets mès iconics e emblematics deth nòste territòri, a trauès d’un nau camin adaptat que permeterà accedir enquiara cascada deth Saut deth Pish.

Atau madeish, tanben s’a facilitat er accès a persones damb visibilitat redusida a bères rotes de senderisme deth territòri, a trauès dera inclusion de quate rotes ena app Blind Explorer, creada entà que persones invidents poguen accedir ath miei naturau e gaudir d’activitats ar aire liure damb era maxima autonomia. Es rotes incorporades ara app son: eth passèg pes pòbles de Castièro, Artiga de Lin, Camin d’Espalias e er accès a Montgarri de Beret estant.

“Deth govèrn d’Aran ençà pensam qu’aguesti projèctes son ua oportunitat fantastica entà adaptar eth nòste torisme a ua tipologia de visitants damb besonhs especiaus e aufrir-les alternatives que poguen apropar-les ara realitat deth nòste país e damb es que poguen gaudir des nòsti entorns naturaus d’ua forma fòrça mès accessibla”, asseguraue conselhèr Serrano.

Diversificacion des punts d’interès

Entre es actuacions a desvolopar aguesti pròplèu mesi se trape tanben era dinamizacion deth camin dera Val de Ruda enquia Saboredo, un projècte que preten melhorar e adaptar aguest camin en tot crear un recorrut practicable entà tot tipe d’usatgèrs que permete diversificar es punts d’interès dera Val d’Aran e atrèir excursionistes qu’actuaument tendissen a anar entà Colomèrs.

Aguest projècte contemple un tram d’uns 2,5 km, començant en parcatge de Ruda enquia Saboredo. Un camin qu’actuaument se trape en un estat maumerenc, damb pèires que dificulten eth pas e non guaire ben senhalizat.

“Per miei d’aguest projècte, s’amiarà a tèrme ua adequacion deth camin en tot condicionar un pas entàs excursionistes, se realizaràn consolidacions entà assegurar eth terren e se canalizarà er aigua en d’auti punts, mès tanben se crearà ua tematizacion deth camin entà dar hèr a conéisher era istòria glaciau a trauès de plaques informatives e un itinerari virtuau”, explicaue eth conselhèr Canut.

Creacion d’un torisme identitari de valor

Er element diferenciau mès important deth nòste territòri ei era identitat, cultura e lengua d’Aran, un patrimòni present enes nòsti pòbles e qu’eth Plan de Sostenibilitat Toristica dera Val d’Aran vò méter en valor.

Pr’amor d’açò, se realizaràn diuèrsi projèctes entà apropar era nòsta cultura as persones que mos visiten. Per un costat, se crearàn autoguides que faciliten informacion sus er Ecomusèu Çò de Joanchiquet, entà qu’es sòns visitants poguen conéisher de prumèra man coma ère era vida tradicionau en un pòble de montanha coma Vilamòs. Dera madeisha manèra, se crearàn audioguides des pòbles dera Val d’Aran, locutades en diferenti idiòmes, e se plaçaràn pannèus informatius entà substituir es existents, damb informacion sus lòcs d’interès, rotes e d’autes donades importantes.

Atau madeish, se cerque méter en valor un des punts istorics mès importants dera Val d’Aran, eth Castèth Leon d’Es Bòrdes, a on s’amiaràn trabalhs de tematizacion e melhora der accès, ath delà d’un video damb era reconstruccion en 3D d’aguest castèth.

Regulacion d’accès ath miei naturau

En tot continuar damb es trabalhs de regulacion d’accès ath miei naturau qu’eth Conselh Generau d’Aran ven implementant es darrèri ostius ena Artiga de Lin, Varradòs, Colomèrs, Valarties, Bassa d’Oles e Bassa d’Arres, pendent es pròplèu mesi ei prevista era installacion de sensors entà compdabilizar era circulacion de veïculs en diuèrsi punts d’interès dera Val d’Aran.

“Era finalitat d’aguesta regulacion ei poder aufrir as nòsti visitants era melhor experiéncia en accedir ad aguesti punts d’interès, per aguest madeish motiu, laguens deth Plan de Sostenibilitat ei previst tanben eth plaçament pendent es pròplèu mesi, de pantalhes d’informacion a temps reau non sonque dera aucupacion des parcatges, senon tanben sus d’auti tèmes d’interès coma es pistes talhades pes corses o eth perilh de lauegi en iuèrn, entre d’auti ahèrs” manifestaue eth conselhèr Canut.