• Eth prumèr brolhon deth Plan de Gestion der Os contemplaue era creacion de “zònes critiques” entara conservacion der os enes airaus dera Val de Toran, es montanhes de Les e Bossòst, era Val de Varradòs, Bagergue e Montgarri. Totun, eth Conselh Generau d’Aran instèc ara Generalitat, a trauès dera presentacion de diuèrses esmenes, que suprimisse aguesti airaus critics, ua prepausa que siguec acceptada per executiu catalan e que dejà non se contemple en aguest nau Plan.

Deuant des informacions publicades pendent es darrèri dies sus eth supausat projècte de restringir eth pas enes “zònes critiques” entara conservacion der os en cinc municipis dera Val d’Aran, eth Conselh Generau d’Aran vò aclarir que, dera redaccion deth prumèr brolhon deth Plan de Gestion der Os (an 2020) ençà, eth govèrn deth Conselh Generau d’Aran sollicitèc que se suprimissen es airaus critics entara conservacion dera espècia e, per tant, era susvelhança de quauques activitats. En tot cas, aguest Plan non contemplaue en cap moment era restriccion deth pas des persones en airau naturau.

Era demana deth govèrn aranés siguec acceptada e es versions posteriores d’aguest plan, dejà non contemplen aguesti airaus critics coma mesura de conservacion dera espècia.

Actuauments, se seguís trabalhant en aguest Plan qu’encara non ei aprovat de manèra definitiva.