• Eth DOGC publiquèc era passada setmana era rectificacion dera Lei 8/2022, sus er emplec e er aprenedissatge des lengües oficiaus en ensenhament non universitari, qu’en un prumèr moment suprimie eth caractèr de lengua veïculara der aranés e qu’a estat modificada gràcies ara iniciativa legislativa presentada peth Conselh Generau d’Aran e defensada pera sindica d’Aran en Parlament, entà assegurar juridicaments era veïcularitat dera lengua pròpria d’Aran ena Escòla Aranesa

Sies mesi dempús d’auer registrat en Parlament de Catalunya ua iniciativa legislativa per part deth govèrn d’Aran, eth Diari Oficiau dera Generalitat de Catalunya (DOGC) publiquèc eth passat 3 de mai era modificacion dera Lei 8/2022, sus er emplec e er aprenedissatge des lengües oficiaus en ensenhament non universitari.

En moment dera sua publicacion, en junhsèga de 2022, aguesta Lei suprimie eth caractèr de lengua veïculara der aranés ena escòla, en tot méter en risc juridicaments er estatus der aranés. Damb er objectiu de velhar pera perviuença der aranés, era sindica defensèc en Plen deth Parlament era modificacion d’aguesta norma, aprovada finauments eth passat 19 d’abriu  damb es vòts a favor deth PSC, ERC, Junts per Catalunya e en Comú Podem, era abstencion dera CUP, Ciutadans e eth Grop Mixt, e es vòts en contra de VOX.

Dempús dera modificacion, era disposicion addicionau dera Lei 8/2022, sus er emplec e aprenedissatge des lengües oficiaus en ensenhament non universitari, ara mandate que: “Enes centres educatius d’Aran, es projèctes lingüistics an de garantir er aprendissatge e er us curricular e educatiu abituau der aranés, coma lengua pròpria d’aguest territòri e coma lengua veïculara, de conformitat damb çò qu’establís era normativa aplicabla”.