• Eth nau govèrn deth Conselh Generau d’Aran, constituït eth passat 21 de junh, a dat compde ena session plenària d’aguest maitin dera distribucion de foncions des consehèrs/es e es departaments que gestionaràn

Aguest maitin a auut lòc, ena Casa deth Senhor d’Arròs, eth plen extraordinari a on s’a establit era naua estructura deth govèrn deth Conselh Generau d’Aran entàs pròplèu quate ans.

“Er equip de govèrn qu’aué formalizam, en tot establir es foncions de cadun des conselhèrs e conselhères, serà un equip coesionat, dinamic e damb er objectiu principau de trabalhar entath benèster des persones e entà arténher ua Val d’Aran melhor e damb mès oportunitats” afirmaue era sindica d’Aran, Maria Vergés, en tot híger que: “es aranesi e araneses mos traparàn tostemp dispausadi entà escotar es sòns besonhs e prepauses”.

Pendent era legislatura 2023-2027, aguesta serà era naua estructura dera maxima institucion aranesa:

• Departament de Cultura e Lengua, a cargue dera sindica d’Aran, Maria Vergés
• Departament de Salut e Benèster, a cargue dera sindica d’Aran, Maria Vergés
• Departament de Pompièrs-Emergéncies, a cargue dera sindica d’Aran, Maria Vergés
• Departament de Governacion, Innovacion, Economia e Torisme, a cargue deth conselhèr Amador Marqués.
• Departament de Promocion Economica, Comèrç e Mobilitat, a cargue deth conselhèr Josep Canut
• Departament de Territòri, Paisatge e Cambi Climatic, a cargue deth conselhèr Francés Bruna
• Departament de Gestion Ambientau e Transicion Energetica, a cargue deth conselhèr Oriol Sala
• Departament d’Espòrts, a cargue deth conselhèr Javier Cavero
• Departament de Joenessa, Igualtat e Inclosion Sociau, a cargue dera conselhèra Maria Menis
• Departament d’Abitatge e Agenda Urbana, a cargue deth conselhèr Andreu Cortés
• Departament de Coneishement, a cargue dera sindica d’Aran, Maria Vergés

Eth conselhèr Amador Marqués assomirà eth cargue de vicesindic prumèr, eth conselhèr Francés Bruna eth de vicesindic dusau e eth conselhèr Oriol Sala eth de vicesindic tresau.

Pendent aguest plen, s’an aprovat tanben dues places de personau eventuau en Conselh Generau, ua d’eres en gabinet de sindicatura e era auta coma gestor de projèctes dera institucion.

Atau madeish, s’a presentat era renónia ath cargue de conselhèr per part de Juan Antonio Serrano, qu’a estat escuelhut entà aucupar eth cargue de vicepresident tresau dera Deputacion de Lleida.