• Pendent es dies deth pònt, era Val d’Aran a artenhut un 82,4% d’aucupacion otelèra e auem compdat damb 44.826 clients en territòri, en tot arténher eth recòrd de clients eth 8 de deseme damb 13.191 persones

Era Val d’Aran a barrat damb èxit un pònt de deseme qu’a artenhut un 82,4% d’aucupacion otelèra pendent es dies deth pònt e un 60,5% pendent tota era setmana, ues chifres que contrasten damb es der an 2022, que pendent eth dies deth pònt arribèren ath 64,9% e ath long de tota era setmana sigueren d’un 65,2%.

“Deth govèrn deth Conselh Generau d’Aran ençà valoram fòrça positivament es donades obtengudes pendent aguest periòde de vacances, en quau s’a arribat a arténher eth recòrd de clients en nòste territòri, damb 13.191 persones eth dia 8 de deseme, e 44.826 clients totaus pendent es dies 6 e 9” asseguraue eth conselhèr de Governacion, Innovacion, Economia e Torisme, Amador Marqués, en tot híger que: “ues donades que reflectissen er intens trabalh de promocion que s’amie a tèrme atau coma era qualitat dera aufèrta toristica que balhe era Val d’Aran”.

Atau madeish, es donades obtengudes gràcies ara implementacion deth Big Data a trauès deth Plan de Sostenibilitat Toristica mòstren que, a despièch der aument de clients experimentat, s’a produsit ua disminucion de clients internacionaus pendent aguesti dies: des 44.826 persones que mos an visitat, 1.948 èren clients internacionaus deuant des 42.878 nacionaus.