• A trauès d’aguesta campanha, se vò apropar un shinhau mès era identitat, cultura e singularitat araneses as nòsti visitants en tot compartir es experiéncies vitaus de diuèrsi aranesi e araneses

• Eth prumèr d’aguest seguit de videos, qu’ei dejà disponible enes hilats sociaus oficiaus de Val d’Aran, ei dedicat ara memòria deth senhor Rafael Mombiedro, olimpic aranés, que compartic era sua istòria e que deishec un gran legat ath nòste territòri e ath mon der esquí

Eth Conselh Generau d’Aran, a trauès deth deparament de Torisme, a metut en marcha era sèrie “Gent d’Aran”, un seguit d’entrevistes damb persones de diferents sectors que compartiran era sua experiéncia vitau ena Val d’Aran.

“Damb aguesta accion, volem apropar un shinhau mès era nòsta identitat, cultura e singularitat as persones que mos visiten, en tot dar a conéisher era experiéncia de diuèrsi aranesi e araneses, autant de naishement coma d’adopcion, a trauès d’un canal tant important coma son es hilats sociaus” afirmaue eth conselhèr dde Governacion, Innovacion, Economia e Torisme, Amador Marqués.

Eth prumèr d’aguest seguit de videos ei dedicat ara memòria deth senhor Rafael Mombiedro, olimpic aranés, que compartic era sua istòria e que deishec un gran legat ara Val d’Aran e ath mon der esquí.

Pòs veir aciu eth prumèr video: https://www.youtube.com/watch?v=KsxIqognAts