Eth Conselh Generau d’Aran participe ena presentacion oficiau deth projècte Poctefa Desir

mai 31, 2024 Cabecera, Notícies, Promocion economica, Slider, Torisme

  • Eth Poctefa Desir ei un projècte de cooperacion transfronterèra

 

  • Eth Conselh Generau d’Aran, a trauès der airau de Refugis e Camins, a participat ena presentacion damb era exposicion sus eth trabalh d’informacion Nivologica que s’includirà en aguest projècte

 

Eth deluns passat, eth Refugi de Belagua ena localitat d’Isaba, Navarra, acuelhie era presentacion oficiau deth Projècte de Desvolopament Economic Sostenible a trauès dera Itinerància entre Refugis  (DESIR).

Er objectiu d’aguest nau projècte transpirenenc, integrat laguens dera convocatòria de projèctes deth programa INTERREG-POCTEFA (2021-2027) cofinançat pera Union Europèa, ei milhorar era connexion, era gestion des resèrves e eth lotjament, era promocion deth senderisme omologat entre refugis e eth coneishement dera grana part des refugis de montanha damb guarda des Pirenèus. DESIR ei un projècte de continuitat què vò aprehondir e ampliar eth trabalh hèt per ENTREPYR, un projècte anterior desvolopat en periòde 2014-2020.

 

 

Es principaus accions de DESIR, que s’auràn de desvolopar en un periòde de 3 ans, son milhorar era digitalizacion dera Web www.entrepyr.eu, damb era implementacion dera cartografia entà rotes iuernaus, era ampliacion e milhora de rotes d’interconnexion entre refugis o era celebracion d’un tresau collòqui internacionau de refugis pirenencs.

Eth conselhèr de Torisme d’Aran, Josep Canut, a manifestat: “aguest projècte  tanben vò melhorar eth tractament des captacions des aigües tà melhorar era sua sostenibilitat, atau coma fomentar eth senderisme omologat damb era realizacion d’un estudi detalhat der estat des dus sendèrs pirenencs per excelléncia, eth GR-10 francés e eth GR-11 e eth hilat de sendèrs transfronterèrs”.

A mès deth Conselh Generau d’Aran, es sòcis de DESIR son: Nasuvinsa, Federación Aragonesa de Montañismo (FAM), Federació d’Entitats Excursionistes de Catalunya (FEEC), Fédération française des clubs alpins et de montagne (FFCAM), Fédération Française de Randonnée Pédestre (FFRANDO), Red de Educación Pyrénées Vivantes (REPV), Centre Excursionista de Catalunya (CEC), Federación Navarra de Montaña y Escalada (FNDME), Fédération Française de la randonnée pédestre (FFRP) e Govern d’Andorra.


Vielha, 31 de mai 2024

 

 

Comments are closed.