• Aguest Plan, qu’a estat impulsat peth Conselh Generau d’Aran e a compdat damb era collaboracion des ajuntaments, a un doble objectiu: eth de conéisher eth detalh dera situacion actuau der abitatge en Aran e per un aute costat dessenhar es accions e propòstes entà sajar de paliar era grèu situacion.
• Eth govèrn aranés a presentat as ajuntaments dejà quaques prepauses d’accion entre es que destaquen era creacion d’ua taula de trabalh d’abitatge conjunta entà consensuar es politiques entà amiar a tèrme, er impuls dera oficina d’abitatge d’Aran e era colaboracion damb es administracions superiores entath bastiment d’abitatge a compdar deth 2025.

Eth Conselh Generau presentaue ager as ajuntaments aranesi es resultats dera prumèra diagnòsi encomanada peth govèrn , qu’a de servir de referéncia entà conéisher era actuau situacion der abitatge en Aran e es prumères accions a desvolopar.

Era prumèra prepausa per part deth govèrn aranés, passe pera creacion d’ua taula de trabalh d’abitatge conjunta entà consensuar es politiques entà amiar a tèrme . Ua des prumères actuacions, enes què ja se trabalhe, ei consolidacion dera Oficina d’Abitatge dera Val d’Aran. Actuauments s’emplegue en ahèrs sociaus en tèmes de exclusion tanben en ajudes ara reabilitacion e eficiéncia energetica. Era volontat deth govèrn d’Aran ei tanben meter en marcha ua pròva pilòt d’ua borsa d’abitatge de loguèr entà trencar damb era dinamica actuau copada pes abitatges d’ús toristic.

Era creacion d’ua taula de trabalh s’emmèrque enes negociacions damb era Generalitat entath  desvolopament deth traspàs competenciau en aguesta materia, reclamat peth Conselh Generau de hè lèu dus ans.

Ena amassada se proposèc tanben as ajuntaments participants poder amiar a tèrme un inventari de terrens disponibles, propietat des madeishi consistòris, entà meter-les a disposicion des administracions superiores, Generalitat e Estat entà prebotjar eth bastiment d’abitatge assequible. Aguesta iniciativa s’amie a tèrme dempús dera amassada qu’era sindica d’Aran, Maria Vergés, auie hè ues setmanes damb eth Secretari d’Estat d’Abitatge der Estat Espanhòl, David Lucas, en què eth Govèrn Aranés se comprometíe a trasladar era disponibilitat de terrens entà arténher en tot avalorar era possibilitat d’acòrds er Estat, Generalitat e Conselh.

Entath conselhèr d’Abitatge dera maximau institucion aranesa, Andreu Cortés: “Ena Val d’Aran sonque eth 36% der abitatge ei d’ús abituau, des dotze mil que n’i a sonque quate mil se destinen ath aguest usatge. Aguesta amassada a de servir entà hèr ua radiografía dera situacion entà méter en practica prumères accions qu’ajuden a paliar ua situacion que reconeishem ei fòrça grèu e dramatica pera manca d’abitatge accesible en Aran”.

En aguest sens, era sindica d’Aran manifestaue que: “Ei indispensable qu’es administracions superiores regulen de forma urgenta era qüestion des abitatges toristics, e ac hèsquen en tot facilitar as administracions locaus er exercici des sues competencies” e higie que “eth govèrn d’Aran ei decidit a contribuir ara solucion d’ua problematica qu’ei fòrça complexa e transversau e qu’a de besonh era implicacion e compromés de totes eres”.

Vielha, 5 de Junh 2024