• Eth Plen deth Conselh Generau d’Aran a aprovat aué per unanimitat er autrejament deth Prèmi 17 de Junh 2024 ara Associacion de Donants de Sang dera Val d’Aran, per fomentar era participacion dera societat en un acte tan generós com ei sauvar vides o milhorar er estat de salut de fòrça persones.

• Es Prèmis 17 de Junh, an coma finalitat reconéisher e arregraïr annauments as persones , collectius o entitats que, pr’amor des sòns merits an destacat pes servicis prestadi ara Val d’Aran enes diuèrsi sectors dera vida sociau, culturau, esportiva o economica, en tot dignificar es sòns pròpris encastres e aunorar eth país.

Eth Plen deth Conselh Generau d’Aran a aprovat per unanimitat autrejar eth Prèmi 17 de Junh 2024 ara Associacion de Donants de Sang dera Val d’Aran en reconeishement e arregraïment  ara sua aportacion  e labor en favor dera Val d’Aran.

“Era Associacion de Donants de Sang dera Val d’Aran impulse damb eth sòn trabalh valors com era etica, en tot assegurar eth respècte pera salut e era dignitat  deth donador e possibilitar era participacion ena donacion de toti es estaments dera societat en tot evidenciar pendent  aguesti vint ans  eth naut nivèu de coesion e implicacion dera societat aranesa” , a afirmat era sindica d’Aran, Maria Vergés, e a hijut que: “ath long de decennis an contribuït ara salut publica damb un projècte solid e perdurable en temps”.

Volem rebrembar qu’es Prèmis 17 de Junh, qu’an caràcter de prèmis nacionaus d’Aran, an era finalitat de reconéisher e arregraïr annauments as persones , collectius o entitats que, pr’amor des sòns merits an subergessut pes servicis prestadi ara Val d’Aran enes diuèrsi sectors ena vida sociau, culturau, esportiva o economica, en tot dignificar es sòns pròpris encastres e aunorar eth país.

Er autrejament d’aguest guardon s’amiarà a tèrme pendent er acte institucionau dera celebracion dera Hèsta d’Aran eth deluns que ven 17 de junh tàs 12ores en Mijaran.

Vielha, 12 de junh 2024