• Ua naua programacion d’activitats jos era tematica d’enguan “An dera Tèrra”, que s’amiarà a tèrme en diuèrsi lòcs deth territòri.

En ostiu, era sason damb mès torisme culturau en Aran, er Hilat de Musèus dera Val d’Aran daurís toti es sòns equipaments des deth 8 de junhsèga ar 1 de seteme.

Era contractacion de sèt guides culturaus, per part deth Conselh Generau d’Aran, permet ampliar era ofèrta e daurir es musèus entad aguest ostiu coma eth Musèu dera Val d’Aran e Ecomusèu Çò de Joanchiquet de Vilamòs mès tanben aufrís visites guidades as Mines Victòria, Habrica dera Lan en Vielha e es Mòles d’Unha e Salardú.

Enes gessudes programades, visites entath arric Patrimòni Medievau que se pòt conèisher dera man des guides que mos apròpen as glèises d’Arties, Salardú, Tredòs, Vilac, Unha, Escunhau, Bagèrgue e Betren.

Aguesta ofèrta de guides se complemente damb d’autes activitats, de format mès participatiu e ludic, restacades damb era tematica annau deth musèu: “An dera Tèrra 2024”. Aguestes an coma finalitat dar a conéisher eth nòste entorn naturau entà poder méter en valor e contribusir ara preservacion deth miei ambient.

Es activitats s’an programat en dus blòcs: era “Setmana dera Tèrra” (deth dimenge 21 ath dijaus 25 de junhsèga) e en “Agost de Tèrra” (toti es dimèrcles e dijaus, der 1 ath 22 d’agost).

Era “Setmana dera Tèrra” s’encetarà aguest dimenge 21 damb  lua plea d’ostiu, damb ua observacion astronomica e un concèrt deth grop internacionau de folch pagan Trobar de Morte. Ua auta des prepauses, era presentacion dera exposicion “Abans miràvem la lluna per tot” en Çò de Joanchiquet, sus meteorologia populara.

En “Agost de Tèrra” es activitats se desvoloparàn en diuèrsi lòcs deth territòri. Es dimèrcles 7, 14 e 21 d’agost viraràn ath torn dera tematica miei ambientau damb era guida  de Obaga Activitats. Es dijaus 1, 8 e 22 d’agost, dera man de Júlia Carreras, que darà a conéisher es istòries qu’amaguen es nòsti bòsqui, aigües e cèu.

Era programacion detalhada la pòden trapar enes pannèus que se publicaràn enes hilats de Musèus dera Val d’Aran. Entà mès informacion, se recomane visitar eth Musèu o contactar telefonicament 973 64 18 15.

Vielha, 18 de junhsèga 2024