• Era trobada musicau includís quate concèrts enes glèises de Sant Estèue de Betren, Santa Maria de Vilamòs, Santa Maria de Cap d’Aran de Tredòs e era Mair de Diu dera Purificacion de Bossòst.

Ena agenda culturau entad aguest ostiu non pòden mancar es activitats musicaus qu’acuelh eth nòste patrimòni e qu’enguan compdarà damb un nau cicle de concèrts. Eth Departament de Promocion Economica e Comèrç deth Conselh Generau d’Aran a creat un programa de quate concèrts entàs diuendres d’aguest mes d’agost damb composicions damb diuèrsi estils musicaus.

Eth prumèra actuacion aurà lòc eth diuendres 2 d’agost, ena glèisa de Sant Estèue de Betren, damb eth trio de votz e còrda Pensaments  i Sonoritats, ua barreja de sonates de Johann Sebastian Bach e poesia.

Eth duet de guitarra Dos Guitar Duo aufrirà un vast repertòri ena glèisa de Santa Maria de Vilamòs eth 9 d’agost damb musica restacada as tradicions.

Ua tresau interpretacion musicau amassarà ena glèisa de Santa Maria de Cap d’Aran de Tredòs eth quartet de còrda e flaüta Quartet Prysma e era votz dera soprano Iolanda Dolcet.

Aguest cicle de concèrts d’ostiu se barrarà eth diuendres 23 d’agost damb eth trio de votz e piano Swing de Comarques Eduard Gener, ena glèisa dera Mair de Diu dera Purificacion de Bossòst.

Toti es concèrts d’aguest Cicle d’Ostiu començaràn tàs 19.30 ores, son gratuïts e tà toti es públics.

Vielha, 25 de junhsèga de 2024