• Un milèr de persones an participat en aguesta jornada hestiua de reivindicacion der usatge dera lengua pròpia d’Aran a on s’autrege eth prèmi Lengua Viua tà guerdonar a persones, collectius o institucions que s’agen caracterizat pera sua defensa der aranés o peth sòn supòrt ath collectiu.

Eth collectiu Lengua Viua, creat entara possa der usatge sociau der aranés, a hestejat enguan era sua trentau edicion dera Corsa Aran per sa Lengua, qu’ei era sua activitat mès representativa.

Era simbolica corsa/caminada gessec un an mès des de Montgarri, eth pòrt de Vielha e Les entà arribar en Vielha, qu’enguan amassèc ath torn d’un milèr de persones de toti es pòbles d’Aran en tot manifestar atau era sua estima per aranés.

Un viatge mès se reivindiquèc er usatge dera lengua pròpia d’Aran e s’autregèc eth prèmi Lengua Viua, en aguesta edicion despartit entre eth Conselh Generau, es ajuntaments aranesi e empresaris deth país, un totau de 24 nomenaments, qu’an collaborat ath long d’aguesti ans entà mantier viua aguesta tradicion, un prèmi creat er an 1996 tà guerdonar a persones, collectius o institucions que s’agen caracterizat pera sua defensa der aranés o peth sòn supòrt ath collectiu. Ath long des ans l’an recebut, collectius coma es Pompièrs d’Aran, o persones coma era escrivana Pepita Caubet o mossen Josèp Amiell.

Era presidenta deth collectiu Lengua Viua, Immaculada Caubet, reivindiquèc en sòn parlament celebrat ena plaça d’Aran: “Hètz a conéisher era nòsta lengua ad aqueri qu’arriben naui e que demoren tamb nosati, toti vosati joeni la sabetz, alavetz emplegatz-la de mès en mès, cau èster orgulhosi de deféner ua cultura diferenta. Es hilats sociaus, son eth miei qu’auem de tier tanben en aranés, ath madeish temps que li dam un prestigi”.

Eth collectiu met en marcha, enguan, un nau projècte nomentat “Era peada de mossen Condò Sambeat”, entà portar un bocin dera poesia deth nòste escrivan mès insigne enta cada un des pòbles aranesi, tà que demore escrit en bèth un des sòns carrèrs o places talament coma ja se hec enes cubèrts der Ajuntament de Vielha. Des de Lengua Viua se vò hèr vedibla era estima pera lengua pròpia d’Aran non sonque entàs sòns pròpis vesins senon tanben tàs sòns visitaires.

Era jornada hestiua se barraue damb eth concèrt deth grop occitan Nadau, qu’enguan celèbre es sòns 50 ans dessús des scenaris.

Vielha, 29 de junhsèga 2024