- Eth Conselh Generau d’Aran, amassa damb Lhèida TV, apòste un an mès per aguesta sèria de ficcion e umor entà fomentar era normalizacion lingüistica der aranés ath long des sòns dotze capítols.
- Es quate prumères temporades d’Èm çò qu’èm se pòden veir ara carta e de franc en https://lleidatv.alacarta.cat/emcoquem.
Damb er objectiu d’ajudar a difóner eth coneishement der aranés, SIA e es sòns ajudants, amassa damb es auti personatges que ja coneishem des auti ans, se calen en simulacions entà descurbir tradicions, legendes, toponims o ahèrs d’ortografia.
Damb umor e ficcion, era sèria vò fomentar er emplec der aranés e era sua normalizacion lingüistica damb gags, en un totau de dotze capítols, a on se tracten es errors e dobtes mès comuns que podem auer en parlar o escríuer en aranés.
Entara sindica d’Aran, Maria Vergés: “damb aguesta cincau temporada apostam de nau, des d’un punt de vista creatiu, en emplec der aranés a trauès der audiovisuau, ua manèra d’impulsar era sua promocion e normalizacion dera nòsta lengua pròpria, que se trape en moments delicats en sòn usatge, sustot entre es mès joeni”. E higie: “En uns darrèri estudis hèti peth govèrn d’Aran auem constatat qu’enes hilats sociaus, es mieis de comunicacion mès freqüenti entre es joeni, sonque un 2% des usatgèrs se comunique en aranés, ues dades que placen era nòsta lengua en ua situacion fragila entara sua subervivença”.
Cau rebrembar qu’es quate prumères temporades dera sèria se pòden veir de franc e ara carta en https://lleidatv.alacarta.cat/emcoquem.
Vielha, 1 d’agost 2024