Es aranesi Mario Fernández e Luís Domingo, jogadors dera seleccion espanhòla de curling, conquistèren era medalha d’argent ena finau der European Junior Curling Challenge masculin que se disputèc en Praga era dimenjada passada.

Er equip espanhòl: Mario Fernández, Eduardo de Paz Cureses, Luis Domingo e Gontzal García, capitanejat per Sergio Vez, e entrenat per Katja Kiiskinen, joguèc de tu a tu damb grani equips europèus que compden damb fòrça mès facilitats qu’es espanhòus entà practicar aguest espòrt coma ei eth poder disposar de pistes de curling. Russia superèc a Espanha ena finau, per un ajustat 4-3. Er equip espanhòl artenhec atau era prumèra medalha d’argent dera sua istòria.

Es aranesi inicièren era sua marcha en curling dera man deth club CEVA (Club d’Esquí Val d’Aran) encara qu’actuauments son jogadors deth Barcelona Curling Club.

Eth conselhèr d’Espòrts d’Aran, Luís Carlos Medina, a manifestat “cau soslinhar er esfòrç d’aguesti esportistes que, tot e non dispausar de cap pista de Curling, an artenhut era plata en un campionat de naut nivèu coma ei er European Junior Curling”.

Eth quintet espanhòu participarà ena Universíada que se celebrarà eth pròplèu dia 3 de hereuèr en Granada.