- Es tecnics deth Centre de Lauegi deth Conselh Generau d’Aran comencen era sason d’iuèrn 2024-2025 participant en congrès internacionau ISSW que s’a hèt en Tromso, Norvègia, deth 22 ath 28 de seteme.
- Er ISSW (International Snow Science Workshop) ei eth congrès de nivologia e lauegi mès important deth mon, qu’amasse a tota era comunitat scientifica e professionau implicada, damb eth lèma “Fusionant teoria e practica”.
Eth congrès se hè cada dus ans, en torns, entre Euròpa, Estats Units e Canadà. En aguesta edicion de 2024, damb uns 800 assistents, que se hec en Norvègia, es amfitrions aueren un protagonisme important en tot explicar era realitat d’un país fòrça extens damb un hilat plan long de vies de comunicacion e tanben damb pòbles e cases isolades exposades as lauegi. Ath delà, es montanhes norvegianes an vengut enes darrèri ans ua destinacion populara d’activitats recreatives, e aquerò a hèt a aumentar es accidents per lauegi.
Ath long de tota era setmana se presentèren mès de 300 contribucions en format de charrada orau e de pòster, organizades en sessions tematiques sus mecanica dera nhèu, prediccion de lauegi especifica entà un lòc, prediccion de lauegi regionau, dinamica de lauegi e modelizacion, lauegi d’esguitlaments basaus, instruments, seguiment e deteccion, lauegi e nhèu en contèxte deth cambi climatic, educacion e aprendissatge, gestion deth risc, presa de decisions e comunicacion deth risc. Dimèrcles siguec eth dia dedicat a hèr ua visita de camp entà conéisher un cas d’estudi e/o practic de gestion deth risc de lauegi enes entorns de Tromso. Addicionauments, dissabte se heren uns workshops practics tematics.
Es tecnics deth Centre de Lauegi an contribuït damb dus pòsters que son eth resultat dera investigacion que se hè en centre, ath delà deth trabalh de prediccion de lauegi. Jordi Gavaldà presentèc er estudi “Applying the GROM score on snow profiles from human-triggered slab avalanches and field observations in Val d’Aran, Pyrenees”, e Montse Bacardit presentèc eth trabalh d’investigacion “Evaluation of the transferability to the Pyrenees of machine learning models developed for avalanche forecasting in the Swiss Alps”. Es dus trabalhs s’an hèt damb era collaboracion d’investigadors e professionaus dera nhèu e des lauegi d’Estats Units e de Soïssa, e aquerò demòstre era posicion capdavantèra deth Centre de Lauegi damb era recèrca mès auançada e actuau.
Era següenta edicion der ISSW se harà en Whistler, BC, Canadà, ena tardor deth 2026.
Mentre non arribe era nhèu que capère es montanhes araneses, eth Centre de Lauegi trabalhe entà premanir era prediccion de lauegi entara sason d’iuèrn.
Vielha, 21 d’octobre 2024