Era sindica d’Aran s’a amassat aguest maitin en Barcelona damb era conselhèra d’Economia e Finances dera Generalitat entà tractar, entre d’autes qüestions, sus era aprobacion deth qu’a d’èster eth Modèl de Finançament dera Val d’Aran en contèxte d’aquerò que mandate era Lei de Regim Especiau d’Aran, e qu’a de perméter consolidar er autogovèrn e es servicis ara ciutadania d’Aran.

Era sedença deth Departament d’Economia e Finances dera Generalitat de Catalunya a acuelhut aguest maitin era trobada entre era sindica d’Aran, Maria Vergés, e era conselhèra d’Economia e Finances, Alícia Romero, en marc dera ronda de contactes qu’eth govèrn aranés manten pendent aguestes setmanes damb es diuèrsi conselhèrs e conselhères dera Generalitat. Mès tard, s’a amiat a tèrme tanben ua amassada de tipe tecnic entre es equips d’andús govèrns.

Ua des principaus qüestions que s’an tractat ena amassada ei era creacion deth grop de trabalh qu’a de perméter era redaccion e aprobacion deth Modèl de Finançament dera Val d’Aran pendent 2025, en tot complir damb era Lei d’Aran e en hèr posible qu’eth Conselh Generau d’Aran pogue desvolopar de manèra efectiva eth sòn encastre competenciau.

Atau madeish, deuant des trabalhs qu’eth govèrn dera Generalitat amie a tèrme entara aprobacion des sòns pressupòsti, era sindica d’Aran a trasladat eth besonh de qu’entà 2025 “se pogue prorrogar er acòrd pressupostari damb eth Conselh Generau d’Aran, entà perméter, per un costat, complir damb es déuers ineludibles qu’a era maxima institucion aranesa e qu’an a veir, entre d’auti, damb era atencion as persones, e, per aute, poder seguir desvolopant es diuèrses accions e projèctes enes qu’eth govèrn aranés trabalhe, amassa damb eth mantenement des servicis tara ciutadania” a manifestat era sindica d’Aran.

En aguest sens, era sindica d’Aran a trasladat tanben ara conselhèra d’Economia e Finances, eth besonh qu’es naui pressupòsti dera Generalitat de Catalunya “contemplen es inversions que manquen desvolopar en nòste territòri coma pòden èster era melhora dera C-28 o eth bastiment d’un centre culturau.

Era sindica d’Aran a volut tanben arregraïr era predisposicion e volontat de consens dera conselhèra Romero, en tot méter en valor er acòrd entà poder barrar eth Modèl de Finançament d’Aran.

Vielha, 23 d’octobre 2024