• Aguesta trobada, includida en torn de contactes institucionaus qu’amie a tèrme era Sindicatura d’Aran, a servit enta apregondir enes principaus ahèrs institucionaus enes que trabalhen es dus govèrns e qu’era sindica d’Aran ja expausèc ena sua trobada damb eth president dera Generalitat setmanes endarrèr, qu’an a veir damb eth reconeishement dera singularitat dera Val d’Aran, eth modèl de finançament e damb era inversion dera Generalitat e era actualizacion de diuèrsi traspassi competenciaus

• Atau madeish, pendent era trobada, era sindica d’Aran e eth conselhèr dera Presidéncia an tractat sus qüestions mès generaus ath torn deth desvolopament territoriau e deth papèr e rèptes qu’eth Pirenèu a d’afrontar e que passen per revertir es grèuges istorics acumuladi en aguest territòri

Eth Palai dera Generalitat de Catalunya a acuelhut aguest maitin era trobada institucionau entre era sindica d’Aran, Maria Vergés, e eth conselhèr dera Presidéncia, Albert Dalmau, e ena que tanben se i a hijut eth secretari de govèrns locaus e relacion damb Aran, Xavier Amor, laguens deth torn de trobades institucionaus qu’eth govèrn aranés manten ath long d’aguestes setmanes.

Era sindica d’Aran a expausat ath conselhèr de Presidéncia es diuèrsi ahèrs enes que cau trabalhar ath long d’aguesta legislatura e que ja li auancèc ath president dera Generalitat pendent era sua trobada eth dia 4 d’octobre. Dempús dera trobada mantenguda ager damb era conselhèra d’Economia e Finances, era sindica d’Aran a expausat ath conselhèr es diuèrses qüestions relacionades damb aguest domeni, qu’an coma objectiu eth barrament d’un modèl de finançament entà Aran pendent er an 2025, qu’a de facilitar e milhorar es servicis publics gestionadi peth Conselh Generau d’Aran.

Pendent era amassada s’a tractat tanben des traspassi e actualizacion de traspassi pendenti entad aguesta legislatura, entre es quaus i son es de lengua, cultura, abitatge, en encastre d’aquerò que ditz era Lei d’Aran, ath temps qu’era sindica d’Aran s’a interessat tanben pes propòstes qu’eth govèrn catalan a entath desvolopament territoriau sociau e economic deth Pirenèu, com era previsibla aprobacion dera Lei de Montanha e der Estatut des municipis ruraus, ja que, d’aguesta manèra, e com a manifestat era sindica: “son qüestions de naut interès entath Govèrn d’Aran, que ja hè temps que trabalhe amassa damb es diuèrsi conselhs comarcaus deth Pirenèu ta establir estratègies qu’ajuden ara melhora d’aguest territòri e que passen, sense cap de dobte, pera implicacion deth Govèrn dera Generalitat”.

Finaument, es dus govèrns an acordat trabalhar amassa entà que, tanlèu que sigue possible, se pogue trobar er encaish juridic e administratiu dera maxima institucion aranesa que permete eth desvolopament complet e era consolidacion dera sua autonomia politica. En aguest sens, an refortilhat eth sòn compromís entara proteccion, promocion e normalizacion der aranés coma lengua pròpria d’Aran e oficiau en tot Catalunya.

Vielha, 24 d’octobre de 2024