• Aran Salut e eth Plan Director de Malauties Vasculares de Catalonha arriben a un acòrd entà coordinar-se e avalorar eth tractament tàs pacients qu’an patit un trombe vascular tà minimizar-ne es sequèles.

A compdar der un de noveme, eth sistèma sanitari aranés, s’a hijut ath Programa ICTUS Catalunya, dempús der acòrd entre es Servicis Integrats Aranesi, deth Conselh Generau d’Aran e eth Plan Director de Malauties Vasculares de Catalonha.

Eth programa permet hè ua prumèra avaloracion per part des professionaus d’Aran Salut. Entre es possibles vies d’intervencion se prevé eth desplaçament dirècte entà un des centres,  damb convèni de collaboracion, en foncion dera gravetat. Tanben, contemple ua prumèra intervencion der Espitau Val d’Aran, a on s’aplicarà era medicacion de besonh tà dissòlver eth trombe vascular e minimizar eth risc de sequèles entath pacient, damb derivacion posteriora tàs centres damb servici de neurologia, en ambulància o en elicoptèr. Aguesta prumèra intervencion serà coordinada telematicament damb eth Departament de Neurologia der Espitau Arnau de Vilanova de Lleida, entà determinar, dempús d’un TAC, eth protocòl d’intervencion mès apropiat tath pacient, entre Aran Salut e er Arnau de Vilanova.

Cau díder qu’eth Conselh Generau d’Aran, a trauès d’Aran Salut, ja a convènis de collaboracion signadi damb er Espitau Arnau de Vilanova (Lhèida), Hospital del Mar (Barcelona), eth CHU (Centre Hospitalier Universitaire) de Tolosa e eth Centre Hospitalier Comminges Pyrénées de Sant Gaudenç.

Vielha, 15 de Noveme 2024