• Era sindica d’Aran, Maria Vergés, e era conselhèra de Coneishement deth Conselh Generau d’Aran, Angelina Cases, s’an amassat damb era consellera d’Educació e Formació Professional dera Generalitat de Catalunya, Esther Niubó.

• Ena trobada an tractat sus qüestions relacionades damb er impuls dera lengua e dera ofèrta formativa en Aran.

Era sindica d’Aran, Maria Vergés  e era conselhèra de Coneishement deth Conselh Generau d’Aran, Angelina Cases, s’an amassat aguest maitin  damb era consellera d’Educació i Formació Professional dera Generalitat de Catalunya, Esther Niubó, damb qui a tractat diuèrsi ahèrs relacionadi damb er aranés ena escòla atau coma dera ampliacion e melhora dera ofèrta formativa en nòste territòri. Atau madeish, era sindica d’Aran a sollicitat ara conselhèra eth desvolopament der article 55 dera Lei de Regim Especiau d’Aran per çò que hè ara implementacion dera Zòna Educativa d’Aran.

“Qu’era Val d’Aran esdevengue Zòna Educativa a de perméter, entre d’autes qüestions, desvolopar politiques educatives especifiques e adaptades as besonhs deth nòste territòri, coma pòt èster compdar damb naui quadres formatius relacionadi damb es rèptes deth territòri” declaraue era sindica d’Aran.

En aguest sens, era conselhèra Cases, higie que  “a despièch qu’eth govèrn d’Aran non a competéncies en aguest airau, ei era nòsta volontat desvolopar accions qu’ajuden ara Escòla Aranesa, qu’entenem coma un des pilars fondamentaus dera nòsta societat, a desvolopar-se coma element d’integracion e de desvolopament sociau”.

En aguest sens, cau rebrembar qu’eth Conselh Generau d’Aran impulsèc en 2022 era creacion dera Taula d’Ensenhament d’Aran entà establir un espaci de coordinacion e participacion, que compde damb era preséncia deth govèrn aranés , es direccions des escòles d’Aran, e tecnics de Politica Lingüistica deth Conselh Gnerau d’Aran tà establir un debat constructiu sus er ensenhament en Aran e, per un aute, impulsar accions qu’ajuden ath desvolopament e consolidacion dera Escòla Aranesa coma element vertebrador dera nòsta societat e coma motor deth procès de normalizacion lingüistica.

Vielha, 18 de noveme 2024