• Era sindica d’Aran trasladèc eth besonh de barrar definitivaments era actualizacion deth traspàs en matèria de cultura, encetat era passada legislatura, atau coma establir es ahèrs enes qu’andús govèrns pòden collaborar entâ impulsar era creacion e promocion culturau en Aran.

Era sindica d’Aran, Maria Vergés s’amassaue  ager damb era conselhèra de Cultura dera Generalitat de Catalunya, Sònia Hernández, entà tractar sus ahèrs coma eth traspàs competenciau o eth bastiment d’un centre culturau en Aran, que ja se comencèren a trabalhar era passada legislatura.  Era sindica, Maria Vergés, li  trasladaue eth besonh de revisar e actualizar era partida economica destinada ath foment e promocion dera cultura en Aran.  Ua revision que passe tanben per materializar eth transferiment en matèria de servicis d’arqueologia e patrimòni arqueologic. En aguest sens s’acordaue era creacion d’un espaci de trabalh conjunt que permete auançar en projèctes que pertòquen as dues institucions.

Aran patís un infrafinançament estructurau en inversions en matèria de cultura. En aguest sens era sindica d’Aran a hèt a arribar ara conselhèra de Cultura er acòrd artenhut, eth passat 2 de noveme deth 2023, ena Comission Bilaterau Conselh-Generalitat, damb eth Departament de Cultura, a on s’acordaue er inici d’ua inversion entath bastiment d’un nau Centre Culturau, ua des mancances estructuraus de besonh en país.

Eth traspàs de competéncies en matèria de cultura, siguec eth prumèr qu’artenhie eth govèrn aranés des dera sua reinstauracion en 1991, ua competéncia que se signaue en 1992 en matèria de patrimòni culturau en airau de gestion de musèus, bibliotèques e archius, promocion e difusion culturau e de politica lingüistica.

Vielha, 19 de noveme 2024