• Eth conselhèr d’Agricultura, Ramaderia, Pesca e Alimentacion dera Generalitat de Catalunya, Òscar Ordeig, visitèc ager eth Conselh Generau d’Aran a on ère recebut pera sindica d’Aran, Maria Vergés.

Aguesta trobada, emmercada ena ronda de contactes deth govèrn aranés damb eth catalan, siguec era ocasion entà qu’era sindica d’Aran trasladèsse es diuèrses qüestions qu’eth Conselh Generau d’Aran a dessús dera taula relacionades damb era actualizacion quauques competéncies, especiauments es qu’an  a veir damb era gestion der forestau, mès tanben damb er impuls dera agroalimentacion e eth supòrt ara ramaderia. Atau madeish, pendent era visita, eth conselhèr copresidic amassa damb era sindica d’Aran, eth plen deth Consòrci grop Leader Pirenèu Occidentau, en qu’era Val d’Aran n’a era presidéncia.

Era sindica, Maria Vergés, destacaue que “actualizar en nòste encastre competenciau en airaus tant importants coma era gestion forestau e ambientau, o era agroalimentacion, mos a de perméter consolidar es projèctes actuaus e potenciar atau era diversificacion economica e er impuls dera agroalimentacion ena Val d’Aran” .

Eth conselhèr Ordeig anoncièc ena sua visita qu’en 2025 Catalonha esdevierà Region Mundiau dera gastronomia, ua ocasion qu’aurà de servir tà méter en valor de manèra conjunta era codina regionau, es productes de proximitat e es petiti productors. Ua iniciativa tara qu’era sindica d’Aran expressèc era volontat deth Conselh Generau d’Aran de prener-i part.

Vielha, 21 de noveme 2024