• Era Marxa Beret, organizada peth Conselh Generau d’Aran e Baqueira Beret, ei ua des pròves d’esquí nordic mès assolidades que se hèn en territòri nacionau e que cada an compde damb ath torn de 1.000 participants de tota Euròpa.

• Es inscripcions ja se pòden hèr ena plana web oficiau dera corsa enquiath 26 de gèr e de manèra presenciau, er 1 de hereuèr.

 Un an mès, s’apròpe era celebracion d’ua naua edicion dera Marxa Beret, organizada peth Conselh Generau d’Aran e era estacion d’esquí Baqueira Beret, qu’aurà lòc era dimenjada der 1 e 2 de hereuèr de 2025.

Ja son dubèrtes oficiaument es inscripcions a trauès dera plana web dera Marxa Beret e es interessats e interessades les poiràn hèr enquiath 26 de gèr, telematicament. Er 1 de hereuèr tanben se poiràn hèr es inscripcions presenciaus en Centre Polivalent de Vielha.

Cau rebrembar qu’eth prètz dera inscripcion aumentarà a mesura que s’apròpe era data der eveniment.

Era Marxa Beret ei ua des pròves d’esquí nordic mès assolidades que se hèn en territòri nacionau e que cada an compde damb uns 1.000 participants de tota Euròpa.

Aguesta hèsta der esquí de hons començarà eth dissabte 1 de hereuèr damb eth Campionat d’Espanha “Esprint” en Plan de Beret.

Eth dia 2 de hereuèr se correrà era 45au edicion dera Marxa Beret enes distàncies de 42, 21 e 10 quilomètres.

Enguan, coma nauetat, era Marxa Beret compdarà damb ua naua pròva, era “Mini Marxa Beret”, entàs mès petits e petites e tanben tà totes aqueres persones que se volguen iniciar ena practica d’aguest espòrt, damb un recorrut de 5 quilomètres e un prètz redusit.

Es interessadi e interessades pòden trapar tota era informacion ena plana web oficiau dera corsa.

Vielha, 30 de noveme 2024