• Mn Amiell, medalha d’òr deth Conselh Generau d’Aran en 2010 e Crotz de Sant Jordi dera Generalitat de Catalunya en 2012, a estat un referent dera cultura e lengua d’Aran en tot èster un destacat actor ena preservacion e promocion deth patrimòni e era istòria d’Aran.

Aguesta net morie Mossen Jusèp Amiell Solé, caperan aranés e referent dera nòsta cultura e lengua. Amiell siguec guerdonat en 2010 per part dera maxima institucion aranesa damb era Medalha d’Òr en reconeishement deth sòn trabalh pastorau e pera sua contribucion entà recuperar e hèr a reviscolar era lengua deth pòble. Atau madeish, en 2012 era Generalitat de Catalunya li autrejaue era “Crotz de Sant Jordi” pera sua “sostenguda tasca de recerca, preservacion e promocion qu’amièc a tèrme deth patrimòni, tradicions e dera lengua d’Aran”.

Eth caperan, qu’ostentèc eth cargue d’archiprèste d’Aran pendent 14 ans, revirèc eth Nau Testament ara lengua aranesa, e siguec un des impulsors der aranés ena litorgia religiosa. Atau madeish, amièc un intens trabalh de recerca ath torn dera istòria d’Aran, en tot èster un des sòns maxims exponents e un gran coneishedor, entre d’auti, dera vida e òbra de Mn. Jusèp Condò Sambeat.

Eth Conselh Generau d’Aran a decretat dus dies de dò oficiau en tota era Val d’Aran coma reconeishença ara sua aportacion desinteressada ara societat aranesa e ara preservacion des sòns valors, lengua e cultura.

Vielha, 18 de deseme de 2024