• Eth govèrn aranés traslade ath màxim representant deth Consejo Superior de Deportes, eth besonh d’agilizar es trabalhs de bastiment deth futur centre d’Espòrts de nhèu e montanha d’Aran, en qu’era Federación de Deportes de Invierno n’ei part implicada.

Era sindica d’Aran, Maria Vergés, e eth conselhèr d’Espòrts, Javier Cavero s’amassauen aguesta passada setmana, en Madrid, damb eth president deth Consejo Superior de Deportes, José Manuel Rodríguez Uribes, entà seguir auançant enes trabalhs d’aguest futur Centre, qu’a d’acuélher formacion esportiva en encastre dera nhèu e dera montanha e qu’eth govèrn d’Aran impulse amassa damb es federacions d’espòrts d’iuèrn catalana e espanhòla, entà plaçar ara Val d’Aran coma territòri de referéncia en sector esportiu.

Ena amassada, era sindica e eth conselhèr hègen arribar ath maxim responsable deth Consejo Superior es besonhs imminents dera creacion d’aguest nau centre, pr’amor qu’a de servir entà aplicar, centralizar e milhorar es actuaus servicis deth Centre de Tecnificacion Especializat en Espòrts d’Iuèrn dera Val d’Aran (CETEI), reconeishut peth madeish CSD en an 2011.

Aguest centre, en paraules deth conselhèr Cavero, “a de servir entà corbir e atier toti es programes vinculats, ja siguen de tecnificacion o de naut rendiment de quinsevolha modalitat des espòrts, damb era finalitat d’aufrir toti es instruments de besonh entara formacion integrau de joeni talents, atau coma entà garantir ua estructura que corbisque es sòns besonhs e arténher atau er Naut rendiment esportiu”.

Entara sindica d’Aran: “Era Val d’Aran ei un territòri de montanha que garantís es condicions meteorologiques e climatologia perfècta entàs entrenaments e era formacion en espòrts de nhèu e montanha pendent tot er an, çò que supòse ua estratègia que non sonque aurie impacte en Aran, tanben enes territòris que l’entoren e ath madeish temps dinamizar de manèra sostenibla eth Pirenèu, tanben damb Frànça pera sua proximitat, a trauès der espòrt, era innovacion, era educacion e era gestion de talents”.

Vielha, 29  de gèr 2025