• Er objectiu dera Taula ei impulsar es accions qu’era Val d’Aran a de besonh en aguesta matèria e qu’an d’ajudar a solucionar era grèu situacion dera manca d’abitatge assequible en nòste territòri.

• Aguest ei eth prumèr pas entà definir era huelha de rota entre eth Conselh Generau d’Aran-Generalitat de Catalunya, dempús dera sua constitucion formau ena comission bilaterau celebrada eth passat 9 de gèr.

Ager tarde se hège era prumèra amassada dera Taula d’Abitatge entre eth Conselh Generau d’Aran e era Generalitat de Catalunya, copresidida pera sindica d’Aran, Maria Vergés, e pera conselhèra de Territòri dera Generalitat, Sílvia Paneque. Es principaus objectius d’aguesta Taula son definir es estratègies e accions de besonh tà dar gessuda ara actuau problematica der abitatge en territòri e garantir-ne er accès accessible e de besonh entara populacion residenta, cercant tanben un desvolopament territoriau sostenible.

En aguest sens, eth conselhèr d’Abitatge e Agenda Urbana, Andreu Cortés, manifestaue que “eth Plan d’Abitatge qu’a impulsat eth Govèrn d’Aran amassa damb era majoritat d’ajuntaments aranesi, entà auer ua radiografia clara dera situacion e es prepauses d’accion mès apropiades entà cada administracion, ei era huelha de rota que volem seguir, amassa damb era Generalitat de Catalunya, entà desvolopar es prumères accions”.

Tath govèrn aranés, aguesta Taula d’Abitatge ei eth marc de negociacion deth traspàs des competéncies ena matèria qu’eth Conselh Generau d’Aran a determinades e qu’encara non s’an desvolopat. Açò aurie de perméter, non sonque ampliar era dotacion economica per part dera Generalitat de Catalunya, qu’enquia 2024 a estat de 12.000 euros annaus, senon tanben era coordinacion des plans tath bastiment d’abitatges de proteccion oficiau qu’impulse eth govèrn catalan e definir es mecanismes de collaboracion e coordinacion entre es dues institucions.

Entara sindica d’Aran, Maria Vergés: “eth compromís deth govèrn d’Aran entà solucionar era problematica d’accès ar abitatge ei ua prioritat, mès auem de besonh era implicacion dera rèsta d’administracions” e higie que “ath delà deth bastiment de naues viuendes destinades a loguèr assequible, ei tanben de besonh qu’er impacte des abitatges d’us toristic sigue regulat administrativament e juridicament”.

Vielha, 04 d’hereuèr 2025